Балаҕан ыйын 26 күнүгэр Майаҕа оҕо-аймах таптаан тоҕуоруһар “Майа сайына” болуоссакка М.И.Брызгалова аатынан Майатааҕы оҕо бибилэтиэкэтэ Арассыыйаҕа Дьиэ кэргэн, өрөспүүбүлүкэҕэ Оҕо саас сылларынан ”ОТОН. фест” маҥнайгы өрөспүүбүлүкэтээҕи дьиэ кэргэн патриотическай бэстибээл чэрчитинэн «ОТОН. фест» түмүктүүр тэрээһини ыытта.
Санатар буоллахха, бэстибээл атырдьах ыйын 22 күнүгэр Дьокуускайга арыллыытыгар оҕо бибилэтиэкэтэ биллиилээх оҕо эколог-суруйааччыта, бэйиэт, кыраайы үөрэтээччи Иннокентий Михайлович Сосин олоҕун, айар үлэтин сырдатар «Киһи дьоло үс төрүттээх…» тэрээһининэн кыттыбыта.
Бүгүҥҥү тэрээһиммитигэр «Кэрэли» оҕону эбии үөрэхтээһин киинин «Мир красок» уруһуй куруһуогун салайааччыта Валерия Судико айылҕа кэрэтин ойуулуур уруһуй техникатыгар, оҕо бибилэтиэкэтигэр өр сылларга сэбиэдиссэйдээбит үтүө сүбэһиппит, настаабынньыкпыт Любовь Дмитриева тымырдаайы өрүүтүгэр үөрэтэр маастар-кылаастары ыыттылар. Маны тэҥэ В.П.Ларионов аатынан Майа орто оскуолатын 10 «б» кылааһын үөрэнээччитэ Алеша Павлов ийэтинээн Екатерина Андреевналыын өйү сайыннарар, дьиэ кэргэни түмэр сыаллаах «Бул. Тал. Кыай” сонун бырайыактарын билиһиннэрдилэр. Букроссинг кинигэ долбуура, оонньуурдарынан атастаһыы, остуол оонньуулара, тургутуктар ыытылыннылар.
Бибилэтиэкэбит доҕотторо хомоҕой хоһооннорунан, ылбаҕай ырыаларынан, эрчимнээх үҥкүүлэринэн тэрээһини киэргэттилэр. Бэстибээли түмүктүүр бэлиэ күҥҥэ көхтөөх кыттыыны ылбыт учууталларбытыгар, уһуйааччыларбытыгар, «Алгыс» бэтэрээннэр кулууптарын түмсүүтүгэр үөрүүлээх быһыыга-майгыга Махтал суруктар туттарылыннылар. «Отон. фест» бэстибээлтэн бука бары уоспутугар отон амтана, сүрэхпитигэр ырыа сылааһа, ааҕыы алыба аргыстаах, кэнчээри ыччаппыт кинигэни, ааҕыыны таптыы улаатарыгар баҕалаах тарҕастыбыт. Отонноотоххо оҥоойук туоларын тэҥэ, оҕолорбут кинигэттэн элбэх билиини-көрүүнү сомсон үөрэхтээх, дьоһун, үтүө дьон буола улааттыннар. «ОТОН. фест», эһиил көрсүөххэ диэри!
