Сэтинньи 30 күнүгэр Майаҕа “Манчаары” эти-хааны чэбдигирдэр комплекска сыллата ыытыллар СӨ үөрэҕэриитин туйгуна, остуол тиэнниһин энтузиаст-тириэньэрэ Александр Георгиевич Игнатьев кэриэһигэр Мэҥэ Хаҥалас улууһун оскуолаларын оҕолоругар аналлаах остуол тиэнниһигэр күрэхтэһии буолан ааста. Манна барыта 15 оскуолаттан 131 оҕо кытынна.
Күрэхтэһии аһыллыытыгар бастыҥ тириэньэрдэргэ үөрүүлээх быһыыга-майгыга наҕараадалар туттарылыннылар. “Майа сэлиэнньэ” тыа сирин түөлбэтин баһылыга Алексей Неустроев, улуус физическэй култуураҕа уонна успуорка управлениетын начаалынньыга Алексей Попов остуол тиэнниһигэр оҕолорго улууспут сүрүн тириэньэригэр Николай Луковцевка “СӨ физическэй култуураҕа уонна успуорка туйгуна”, улуустааҕы оҕо-ыччат успуордун оскуолатын дириэктэригэр Петр Илларионовка П.А., Е.М., В.П.Ларионов аатынан Майа орто оскуолатын остуол тиэнниһин тириэньэригэр Еремей Куприяновка “СӨ физкултуура хамсааһынын 100 сыла” бэлиэлэри, улуустааҕы оҕо-ыччат успуордун оскуолатын тириэньэрдэригэр Марианна Степановаҕа, Арина Федороваҕа СӨ Физическэй култуураҕа уонна успуорка министиэристибэтин Махтал суруктарын туттардылар.
Күрэхтэһии түмүгүнэн Еремей Куприянов тириэньэрдээх В.П.Ларионов аатынан Майа орто оскуолатын хамаандата бастаата. Иккис миэстэни Майа лицейын хамаандата, үсүһү Тиэлиги орто оскуолата ыллылар.
Оҕолорго улахан саастах бөлөххө уолаттарга Вадим Гермогенов (Майатааҕы лиссиэй) бастакы, Антон Нестеров (Майа В.П.Ларионов аатынан оскуола) иккис, Ньургун Федоров (Чүүйэ) үһүс буоллулар. Улахан кыргыттарга Сандаара Степанова (Чүүйэ) бастакы, Саша Нестерова (Чүүйэ) иккис, Яна Никитина (Майа В.П.Ларионов аатынан оскуола) үһүс миэстэлэннилэр.
Орто саастаах бөлөххө уолаттарга Андрей Харитонов (Майатааҕы лиссиэй) бастаата. Иккискэ Ярослав Егоров иккис уонна Рустам Кривошапкин (иккиэн Майа В.П.Ларионов аатынан оскуола) үһүс буоллулар. Кыргыттарга Наина Исакова (Майатааҕы лиссиэй) бастакы, Уйгууна Степанова (Чүүйэ) иккис, Вилена Степанова (Майатааҕы лиссиэй) үһүс миэстэлэри үллэһиннилэр.
Кыра саастаах бөлөххө уолаттарга Майа В.П.Ларионов аатынан оскуолатыттан Рома Илларионов бастакы, Андрей Окороков иккис, Аллараа Бэстээх 2-с №-дээх оскуолатыттан Айсен Сергеев үһүс буоллулар. Кыргыттарга Гаврильева Дайаана (Табаҕа) бастакы, Айта Попова (Майа В.П.Ларионов аатынан оскуола) иккис, Милана Лукина Милана үһүс миэстэлэннилэр.
Маны таһынан тилэх баттаһа күрэхтэспит төрдүс, бэһис миэстэлэри ылбыт инникилээх оҕолору судьуйалар бэлиэтии көрдүлэр. Улахаттарга Майа лиссиэйиттэн Валера Гермогеновы, В.П.Ларионов аатынан оскуолаттан Владик Заровняевы, Ангелина Никитинаны, Тиэлигиттэн Карина Федорованы, орто бөлөххө Тиэлигиттэн Миша Иванову, Майа Ф.Г.Охлопков аатынан оскуолатыттан Вася Шарины, Тиэлигиттэн Дуня Лебедеваны, Майатааҕы лиссиэйтэн Аделаида Иванованы, кыра бөлөххө Майа В.П.Ларионов аатынан оскуолатыттан Эрсан Барабановы, Миша Яковлевы,Тиэлигиттэн Инесса Иванованы, Аллараа Бэстээх 2 №-дээх оскуолатыттан Саша Владимировы. Бу оҕолор бары грамотанан, харчынан, сэртипикээттэринэн бэлиэтэннилэр.
Бириистээх миэстэлэри ылбыттары таһынан 21 кыттааччыга күрэхтэһиигэ дьулуурдарын иһин анал бириистэр туттарылынналар.
Иитиллээччилэрэ үрдүк ситиһиилэри көрдөрбүт тириэньэрдэринэн Еремей Куприянов, Арина Федорова, Ньургун Нестеров, Марина Степанова, Антонина Федорова буоллулар.
Александр Игнатьев кэриэһигэр үһүс төгүлүн ыытыллыбыт күрэхтэһии үрдүк таһымҥа буолан ааста. Александр Георгиевич иитэн-үөрэтэн такайбыт үөрэнээччилэрэ билигин бэйэлэрэ тириэньэр буолан оҕолору остуол тиэннниһигэр дьарыктыыллар. Күрэхтэһии кылаабынай судьуйатынан Ньургун Нестеров үлэлээтэ.
Биһиги дьиэ кэргэн аатыттан тэрээһин успуонсордарыгар кэргэммин, аҕабытын кытары алтыһан үлэлээбит, университекка бииргэ үөрэммит доҕотторугар, Хараҕа, Чүүйэҕэ үөрэппит үөрэнээччилэригэр, Майа, Чүүйэ олохтоох дьаһалталарыгар, оҕолорун доҕотторугар, бары аймахтарбытыгар истиҥ махталбытын тиэрдэбит.
Надежда Игнатьева, Александр Игнатьев огдообото.
