Ахсынньы 24 күнүн иккис аҥаарыгар улуус баһылыгын Дмитрий Тихонов 2024 сыллааҕы үлэтин отчуота Ороссолуода нэһилиэгэр буолла.
Отчуоттуур бөлөххө Ил Түмэн дьокутааттара Олег Марков, Тихон Скрябин, улуус Сэбиэтин бэрэссэдээтэлэ Иннокентий Андросов, дьокутаата Михаил Масаха, улуус управлениеларын уонна тэрилтэлэрин салайааччылара, солбуйааччылара кыттыыны ыллылар.
Нэһилиэк саҥа тутуллубут балаҕаныгар 44 олохтоох муһунна. Дмитрий Иванович 2024 сыл устата Мэҥэ Хаҥалас бары хайысхаларыгар барбыт үлэлэри сиһилии кэпсээтэ. Ыйытыыларга нэһилиэккэ дьиэлэр ититэр ситимнэрэ хонтуруолланара, саҥа култуура, успуорт, үлэһиттэргэ уопсай дьиэлэрин тутуллара, бэтэринээр пууна оҥоһуллара о.д.а. наадатын эттилэр. Оттон гаас ситимэ хаһан тардылларын, үүтү туттарыы, сүөһүнү иитии, кыстыкка киирии саҕана электроуот тоҕо элбэхтэ арахсан ылбытын, Өлүөнэ өрүһү туоратар муоста тутуутугар нэһилиэккэ уонна чугас эргин айылҕаҕа туох уларыйыы барыан сөбүн, Аллараа Бэстээххэ элбэх оҕолоохторго бэриллибит учаастакка туох үлэтэ бара турарын туһунан ыйыталастылар.
Олег Марков улуустан талыллан Ил Түмэҥҥэ үлэлии сылдьар дьокутааттар үлэлэрин сырдатта. Тихон Скрябин тыа хаһаайыстыбатын саҥа сокуоннарын билиһиннэрдэ. Кэтэх хаһаайыстыбаны өрө көтөҕөргө Михаил Масаха бэйэтин холобурунан сиһилии кэпсээтэ.
Ороссолуода нэһилиэгин олохтоохторо байыаннай дьайыыга сылдьар дьоҥҥо күүс-көмө буолалларыгар Дмитрий Тихонов махтал тыллары эттэ.
Иван Лукин.
