Тохсунньу 31 күнүгэр улуус баһылыгын отчуота Ороссолуода нэһилиэгиттэн саҕаланна. Нэһилиэк 41 олохтооҕо дьаһалта ааспыт 2023 сылга ыыппыт үлэтин, инники былааннарын истэ итиэннэ нэһилиэк, улуус сайдыытыгар бэйэтин санаатын этээри муһунна.
Муниципальнай оройуон баһылыга Дмитрий Тихонов ыытыллыбыт үлэ сүрүн тосхоллорун, сыыппараларга, чахчыларга олоҕуран иһитиннэрдэ. Отчуоттуур мунньахха Ил Түмэн Судаарыстыбаннай Мунньах дьокутааттара Олег Марков уонна Тихон Скрябин кыттыыны ыллылар.
Отчуоту истэн баран олохтоохтор араас хабааннаах: тутуу хаачыстыбатын тупсарыы, Чыамайыкы сиригэр көстүбүт сир баайын, нэһилиэккэ хаһан биэлсэр баар буоларын, култуура, успуорт кииннэрин итиэннэ оҕуруот аһын харайар тутуулар хаһан кыаллыахтарын сөбүн, сыллата ууга баралларынан, сааскы халааны утары быйыл туох үлэ былааннанарын, сир туһунан, о.д.а. ыйытыыларыгар тустаах управлениелар салайааччылара, эппиэттээх үлэһиттэрэ сиһилии хоруйдары биэрдилэр.
Ороссолуода нэһилиэгэр култуура киинин, успуорт саалатын тутуу, сыл аайы биэрэк сиҥнэр буолан саҥа суолу оҥорууга үлэ барара наадатын Семен Сивцев бэлиэтээн эттэ. Акулина Мартынова тутуу хаачыстыбатын тупсарарга сүрүн болҕомтону туһаайыахха диэтэ. Уопсастыбаннай тырааныспар сылдьыбатыттан олохтоохтор эрэйи көрөллөрүн этэн туран, өрүс эҥэр нэһилиэктэргэ оптуобус сырыытын олохтууру Татьяна Черноградская туруоруста.
Үөһээ этиллибиттэргэ эбии: нэһилиэнньэ саастаах, кыаммат араҥатыгар олорор усулуобуйаларын тупсарыыга туһуланар үлэ, скважина тутуутун боппуруостарын үөрэтиини, толору хааччыллыылаах дьиэ элбээбитинэн туттуллубут убаҕаһы сүөкүүр сири быһаарыыга көмөнү, нэһилиэккэ тиийбит куйаар ситимин күүһүрдүүнү, улууска бастакынан үөрэхтээһини тарҕаппыт мэссэнээт Герасим Соловьев көмүллэн сытар сирэ ууга барар кутталлааҕынан пааматынньыгын көһөрүүгэ өйөбүлү туруорсан нэһилиэк баһылыга Илья Макаров эттэ.
Ороссолуода олохтоохторо улуус дьаһалтатын үлэтин биһирииллэрин биллэрдилэр.
Февронья ОХЛОПКОВА.
