Күн иккис аҥаарыгар Петр Попов салайааччылаах бастакы отчуоттуур бөлөх Ороссолуодаҕа нэһилиэнньэни кытары көрүстэ.
Мунньахха 41 киһи кытынна. Ороссолуодалар гаас ситимин тардыллыытын, култуура киинин тутуутун, оптика ситиминэн кэлэр интэриниэт сибээһин күүһүрдүүнү, бөһүөлэк аттынан федеральнай автомобильнай тырааныспар суола ааһарынан тыаһы-ууһу аһардыбат экран туруоруутун, тыа хаһаайыстыбатыгар каадырынан хааччыллыыга хамнас боппуруоһа «атахтыырын», чуолаан бэтэринээрдэр хамнастарын үрдэтэри, быраастар, учууталлар, култуура үлэһиттэрин курдук, «Земскэй бэтэринээр бырааһа, биэлсэрэ» бырагыраамалар олохтоноллоругар, Өлүөнэни туоруур муоста тутуллуутунан уонна өрүс сүнньэ уларыйыытынан биэрэги бөҕөргөтүүнү, бөһүөлэк таһыгар айан тыраассатыгар суол быраабылатынан сүөһү сылдьар сирин ыйар сэрэтэр бэлиэлэри туруорууну о.д.а боппуруостары туруорустулар.
Нэһилиэк баһылыгын эбээһинэһин толорооччу Сахайаана Попова ыаллыы сытар Хаптаҕайынан өрүһү туоруур муоста тутуллуутунан итиэннэ халаан уутуттан ууга барар куттал суоһуурунан аллараа баар бөһүөлэги үрдүк сиргэ көһөрүүнү түргэтэтэр инниттэн култуура киинин, инбэлииттэргэ уонна нэһилиэнньэ кыаммат араҥатыгар социальнай наймылаһыы төрүтүгэр олорор дьиэ, оҕуруот аһын харайар сир тутууларын, саҥа кыбаарталга ититии уонна уунан хааччыйыы киллэриллэрин өйүүллэригэр, бөһүөлэккэ гаас ситимэ тардыллыытын бырагыраамаҕа киллэртэрэри, оптика сибээһин салгыы сайыннарарга туруорсууларын кумааҕыга тиһэн отчуоттуур бөлөх салайааччытыгар туттарда.
‒ Ороссолуодалары, эһигини, ааспыт сыл түмүгүнэн бэйэҕит бөлөххүтүгэр нэһилиэккит социальнай-экэнэмиичэскэй көрдөрүүлэринэн кыайыылаах тахсыбыккытынан эҕэрдэлиибин. Бу ситиһиигит сөптөөх хайысханы тутуһан үлэлии олороргутун туоһуулуур. Тыын суолталаах боппуруостаргытын боротокуолга киллэриэхпит. Манна биир сылынан быһаарыллыбат боппуруостар эмиэ бааллар. Ол да буоллар, болҕомтоҕо ылыллан үөрэтиллиэхтэрэ, ‒ диэтэ түмүк тылыгар Петр Иванович.
Мунньах кэннэ кини улуус баһылыга Дмитрий Тихоновы, нэһилиэк баһылыгын эбээһинэһин толорооччу Сахайаана попованы кытары тыыл, үлэ бэтэрээнигэр нэһилиэк, улуус Бочуоттаах гражданиныгар, Үлэ Кыһыл Знамята уордьан кавалерыгар Гаврил Александровка, дьиэтигэр тиийэн РФ Бэрэсидьиэнэ Владимир Путин аатыттан Улуу Кыайыы 80 сылынан үбүлүөйдээх мэтээли туттаран үтүө баҕа санааларын тириэртилэр.
Алена Докторова
