Атырдьах ыйын 3 күнүгэр Ороссолуодаҕа улуу эбэбит Өлүөнэ кытылыгар Эр санаа уордьанын кавалера, тапталлаах сиэн, оҕо, кэргэн, аҕа, эрэллээх табаарыс Айаал Попов сырдык аатыгар спиннинынан балыктааһын күрэҕэ үрдүк таһымнаахтык ыытылынна.
Күрэхтэһии анал байыаннай дьайыыга эдэр олоҕун толук уурбут хорсун уолбут Айаал Ньургустанович Попов аатын үйэтитэр, нэһилиэкпит олохтоохторун, ыччаты уонна оҕолору спортивнай балыктааһыҥҥа көҕүлүүр, айылҕаҕа харыстабыллаах сыһыаҥҥа иитэр, дьиэ кэргэни сомоҕолуур, чөл олоҕу тарҕатар, уопут атастаһар сыаллаах тэрилиннэ.
Тэрээһин үөрүүлээх аһыллыыта алгыһынан саҕаланна. Сиэри-туому биһиги бары ытыктыыр киһибит, байанайдаах булчут, сцена, успуорт бэтэрээнэ Афанасий Владимиров оҥордо, кыттааччыларга үтүө кэскил тыллардаах алгыс бастыҥын анаата. Күрэхтэһии бары кыттыылаахтарыгар эҕэрдэтин олохтоох дьаһалта баһылыга Илья Макаров анаата. Айаал туһунан ахтыыны эдьиийэ Кыыдаана Егоровна Данилова оҥордо.
Күрэххэ уопсайа 27 киһи кытынна: эр дьоҥҥо 11, дьахталларга – 7, оҕолорго – 9. Бары кыттааччылар ох курдук оҥостон, кустук курдук куоһанан кэлбиттэрэ көрүөхтэн астык.
Бу күрэх успуонсардарынан буоллулар: Ороссолуода нэһилиэгин дьаһалтата (баһылык Илья Макаров); «Дьиэ тутар кэмбинээт» аахсыйалаах уопсастыба (генеральнай дириэктэр Александр Дереповскай); Айаал бииргэ үөрэммит оҕолоро – Майатааҕы лиссиэй 2010 сыллаах выпускниктара; Г.И.Соловьев аатынан Ороссолуода орто оскуолата (дириэктэр Иван Барабанов); «Күнчээн» оҕо саадын кэлэктиибэ (салайааччы Акулина Мартынова); «Доблесть» байыаннай дьайыы бэтэрээннэрин түмсүүтэ (салайааччы Афанасий Сергеев); Айаал убайдара, байыаннай дьайыы бэтэрээнэ Петр уонна Иван Трофимовтар; ыкса ыаллара Антонина Егоровна, Константин Леонидович Яковлевтар; Саргылана Николаевна, Илья Валентинович Макаровтар; Айаал Ньургустанович эрэллээх доҕотторо; дьиэ кэргэнэ, аймахтара.
Күрэх кылаабынай судьуйатынан Айаал чугас доҕоро, полиция капитана Егор Трофимов үлэлээтэ. Киниэхэ байыаннай дьайыы бэтэрээнэ, Ороссолуода орто оскуолатын учуутала Петр Филиппов көмөлөстө.
Икки чаастаах күрэхтэһии түмүгүнэн бириистээх миэстэлэри үллэстии маннык буолла. Оҕолорго 3 миэстэ Айгылаан Сильвестров буолла, 2-с миэстэ буолары Валерьян Трофимов ситистэ, 1-кы миэстэни Даниэль Корнилов ылла.
Дьахталларга Альбина Левина 3-с миэстэ буолла, 2-с Мира Корнилова уонна 1-кы миэстэни Наталья Шестакова ылла.
Эр дьоҥҥо 3-с миэстэҕэ Константин Яковлев тигистэ. 2-с миэстэ буолары Дмитрий Яковлев ситистэ. 1-кы миэстэни Евгений Шестаков ылла.
Кыайыылаахтары сэргэ өссө турнир анал ааттара олохтоннулар. «Эдэр балыксыт» анал аат 8 саастаах Коля Сергеевкэ иҥэрилиннэ.
Арассыыйаҕа биллэриллибит Дьиэ кэргэн сылынан күрэххэ «Клёвая семья» диэн анал аат олохтонно. Бу күн 6 дьиэ кэргэн кыттыыны ыллылар. Кыайыылааҕынан Шестаковтар дьиэ кэргэн таҕыстылар.
«Аҕам саастаах балыксыт» – «Рыбак-аксакал» эр дьоҥҥо анал аат 71 саастаах, элбэх ыччаты балыкка уһуйбут байанайдаах балыксыкка Константин Яковлевка иҥэрилиннэ.
Дьахталларга бу анал ааты 63 саастаах, талба талааннаах нэһилиэкпит иистэнньэҥэ Альбина Шергина ылла.
Күрэххэ саамай улахан балыгы тутан «Ценный экземпляр» анал аат Евгений Шестаковка иҥэрилиннэ.
Ороссолуодаҕа аан бастаан спиннинынан балыктааһын күрэҕин кыайыылаахтара дуорааннаахтык ааттаннылар, дьон-сэргэ быйылгы күрэҕи астына көрдө.
Поповтар дьиэ кэргэн чугас киһилэрин сырдык аатыгар ыытыллыбыт күрэх үрдүк таһымнаахтык ааспытын бэлиэтээн, онтон олус үөрэн, долгуйан туран бары тэрээһини өйөөбүт дьоҥҥо – успуонсардарга махтал суруктарын туттардылар. Тэрээһин бары кыттыылаахтарын, ыалдьыттарын кутааҕа буспут миининэн, минньигэс туордунан, арбуһунан күрдүлээтилэр.
Тэрээһиҥҥэ кыттыыны ылбыт күрэх ыытааччыларыгар, дьүүллүүр сүбэҕэ, бары кыттааччыларга алгыспытын аныыбыт. Толкуйдаабыккыт тобуллан, туолан истин, санаабыккыт сааһыланан, баҕа санааҕыт барҕара туруохтун! Аймах-билэ дьоҥҥут, оҕоҕут-уруугут доруобай, дьоллоох буоллуннар!
Ольга Попова,
Айаал Попов ийэтэ.
