Оройуон Сэбиэтигэр
Балаҕан ыйын 8, 9, 10 күннэригэр муниципальнай быыбарга талыллыбыт «Мэҥэ Хаҥалас улууһа» муниципальнай оройуон V ыҥырыылаах дьокутааттарын бастакы тэрээһин сиэссийэтэ балаҕан ыйын 19 күнүгэр Аллараа Бэстээххэ ыытылынна.
Оройуон Сэбиэтигэр талыллыбыт биир мандааттаах 10 уокурук уонна баартыйалар испииһэктэринэн 10, уопсайа 20 дьокутааты дьон-сэргэ үрдүк итэҕэлин сүкпүттэринэн Мэҥэ Хаҥалас улууһун баһылыга Дмитрий Тихонов истиҥник эҕэрдэлээтэ уонна улуус дьаһалтатын аатыттан эҕэрдэ суруктары туттарда.
‒ Оройуон Сэбиэтигэр быйыл күүстээх састаап талылынна диэн сыаналыыбын, ‒ диэн бэйэтин эҕэрдэ тылыгар бэлиэтээтэ Дмитрий Иванович. ‒ Араас сылларга улуус итиэннэ нэһилиэк баһылыктарынан, улуус салалтатыгар үлэлээбит уонна билигин олох бары салааларыгар, ол иһигэр тыа хаһаайыстыбатыгар, дьиэ-уот хомунаалынай хаһаайыстыбатыгар, доруобуйа харыстабылыгар, үөрэҕириигэ, тутууга, култуураҕа о.д.а үлэлиир дьон киирдигит. Ити ‒ олус үчүгэй. Биэс сыл устата бары биир санаанан салайтаран дьоммут-сэргэбит, улууспут туһугар бииргэ үлэлиэхпит диэн бигэ эрэллээхпин.
Мэҥэ Хаҥаластааҕы территориятааҕы быыбаардыыр хамыыһыйа бэрэссэдээтэлэ Ирина Назарова киирии тылыгар быыбар түмүгүн билиһиннэрдэ. Оройуон Сэбиэтин дьокутааттарын быыбарыгар 69 хандьыдаат кыттыбыт, ол иһиттэн биир бэйэ туруоруутунан регистрацияламмыт хандьыдаат баҕа өртүнэн устуммут, биир хандьыдааты хамыыһыйа сокуоҥҥа сөп түбэспэтинэн регистрациялаабатах, икки хандьыдаат регистрацияны ааһан баран сайабылыанньа биэрэн бэйэлэрин устуммуттар уонна биэс баартыйа кыттыбыт. Саамай бастыҥ көрдөрүүнү «Биир ньыгыл Арассыыйа» баартыйа 65,78 бырыһыан көрдөрүүлээх ситистэ. Бу баартыйаҕа 9074 киһи куоластаата. «Новые люди» 1856 киһи (13,45%), «КПРФ» 1467 (10,63%), «Сиэрдээх Арассыыйа ‒ Кырдьык иһин» 909 (6,59%), «ЛДПР» 172 (1,25%) ыллылар.
Ирина Назарова оройуон Сэбиэтин биир мандааттаах уокуруктарыгар дьокутаатынан талыллыбыт Мөҥүрүөн нэһилиэгин баһылыгар Иннокентий Андросовка (Мэҥэтээҕи), Майатааҕы РЭС учаастагын начаалынньыгын солбуйааччытыгар Николай Борисовка (Төҥүлүтээҕи), «Мэҥэ-тутуу» ПК салайааччытыгар Николай Докторовка (Илин Майатааҕы), В.П.Уваров аатынан Олимпийскай эрэллэр оскуолаларын дириэктэригэр Дьулустаан Захаровка (Приленскэйдээҕи), Аллараа Бэстээх 2 №-дээх оскуолатын дириэктэригэр Ольга Колмаковаҕа (Аллараа Бэстээхтээҕи), «Чүүйэ» МУТ дириэктэригэр Аркадий Лукиҥҥа (Арҕаа Майатааҕы), Р.Г.Васильев аатынан кыраайы үөрэтэр мусуой дириэктэрин эбээһинэһин толорооччу Михаил Масахаҕа (Тыыллыматааҕы-Наахаратааҕы), «Протек» ХЭО генеральнай дириэктэригэр Ян Новиковка (Суолатааҕы), киин балыыһа биэлсэригэр Иван Пивоваровка (Хотугу Майатааҕы), предприниматель Александр Слепцовка (Табаҕатааҕы-Баатаратааҕы) итиэннэ баартыйалар испииһэктэринэн ‒ «Биир ньыгыл Арассыыйа баартыйаттан Д.Ф.Ходулов аатынан норуот айымньытын дьиэтин дириэктэригэр Екатерина Ефремоваҕа, ОДьУоКХ Мэҥэ Хаҥаластааҕы филиалын үлэ харыстабылыгар сүрүннүүр исписэлииһигэр Руслан Никаноровка, үөрэх үлэһиттэрин улуустааҕы боропсойууһун бэрэссэдээтилигэр Иннокентий Скрябиҥҥэ, В.П.Уваров аатынан Олимпийскай эрэллэр оскуолаларын дириэктэрин хаһаайыстыбаннай чааска солбуйааччы Александр Тишковка, улуустааҕы үөрэх управлениетын начаалынньыгар Гаврил Толстяковка, «Хоту» ТХПК кылаабынай технологар Надежда Федотоваҕа, ДьУоКХ улуустааҕы филиалын дириэктэригэр Иннокентий Яковлевка, «Сиэрдээх Арассыыйа ‒ Кырдьык иһин» баартыйаттан Аполлон Поповка, «Новые люди» баартыйаттан Альберт Егоровка, «КПРФ» баартыйаттан Валерий Филипповка дастабырыанньалары туттарда.
Тэрээһин сиэссийэҕэ дьокутааттар оройуон Сэбиэтин бэрэссэдээтэлин таллылар. Улуус баһылыга Дмитрий Тихонов Иннокентий Андросовы, дьокутаат Альберт Захаров Иннокентий Яковлевы туруорарга этии киллэрдилэр. Ол эрэн, Иннокентий Яковлев бэйэтэ аккаастанан кандидатуратын куоластааһыҥҥа киллэртэрбэтэ. Аһаҕас куоластааһын түмүгүнэн баһыйар үгүс куолаһы ылан Иннокентий Андросов оройуон Сэбиэтин бэрэссэдээтэлинэн талылынна. Кини солбуйааччытынан Гаврил Толстяковы таларга этиитэ дьокутааттар өйөбүллэрин ылла.
Оройуон Сэбиэтин дьокутааттарыгар туһаайан бэйэлэрин эҕэрдэлэрин, баҕа санааларын СӨ Судаарыстыбаннай Мунньаҕын (Ил Түмэнин) дьокутаата Андрей Находкин, СӨ Ил Дарханын уонна Бырабыыталыстыбатын иһинэн Олохтоох бэйэни салайыныыга департаменын салайааччыта Николай Захаров, Мэҥэ нэһилиэгин баһылыга, олохтоох бэйэни салайыныыга улуустааҕы сэбиэт бэрэссэдээтэлин солбуйааччы Александр Куприянов, Ытык Сүбэ бэрэссэдээтэлэ Зиновий Игнатьев тиэртилэр.
‒ Саҥа састаап улууспут сайдыытыгар интэриэһинэйдик үлэлиэҕэ диэн эрэллээхпит. Улууспутугар улууспут баһылыга Дмитрий Иванович ситэриилээх, оттон оройуон Сэбиэтин бэрэссэдээтэлэ Иннокентий Андросов бэрэстэбиитэллээх былаастар бэрэстэбиитэллэрэ буолаллар. Онон икки атахха чиҥник туран улууспут баһылыгын солбуйааччылара, управлениелар, тэрилтэлэр салайааччылара бары биир сыалга-сорукка үлэлииллэригэр улахан акылаат уурулунна. Эһиги, дьокутааттар, уокуруктарынан уонна баартыйалар испииһэктэринэн талыллаҥҥыт төһүү күүскүтүнэн, тирэххитинэн улууспут нэһилиэнньэтэ, нэһилиэктэр баһылыктара буолаллар. Бары тутуспутунан күүскүтүн түмэн, ким тугу кыайарынан улууспут сайдыытыгар кылааккытын киллэрэргитигэр баҕа санаабын тиэрдэбин, ‒ диэтэ Ил Түмэн дьокутаата Андрей Находкин.
Алена ДОКТОРОВА.
