Олунньу 20 күнүгэр «Дьол түһүлгэтэ» уопсастыбаннай кииҥҥэ Улуу Кыайыы 80 сылын көрсө бэлэмнэммит «Оонньоммотох оҕо саас» иккис кинигэ сүрэхтэннэ.
Бу кинигэ «Дани-Алмас» хампаанньаҕа 100 ахсаанынан бэчээттэнэн таҕыста. Бастакы кинигэҕэ 90, оттон иккис кинигэҕэ 99 – 1936-1945 сылларга төрөөбүт, уһун сылларга Майа сэлиэнньэтигэр олорон, үлэлээн ааспыт сэрии сылын оҕолорун туһунан ахтыылар киирбиттэр.
Кинигэ эрэдээксийэлиир сүбэтигэр Мария Лукина, Мария Сергеева, Татьяна Артемьева үлэлээтилэр, тэхиниичэскэй эрэдээктэр Марфа Птицына. Салгыы «Оонньоммотох оҕо саас» үһүс кинигэтэ бэчээттэнэрэ былааннанар.
Бэлиэ күнү СӨ үөрэҕириитин туйгуна Татьяна Артемьева алгыс тылынан арыйда уонна иилээн-саҕалаан ыытта. И.М.Сосин аатынан улуустааҕы киин бибилэтиэкэ кылаабынай бибилэтиэкэрэ Марина Трифонова кинигэ ырытыытын оҥордо. Кинигэни оҥорууга үлэлэспит дьон эҕэрдэ, махтал тылларын Дмитрий Егоров, Дмитрий Санников, Степан Копырин ырыанан, Иннокентий Осипов баяҥҥа доҕуһуолунан киэргэттилэр.
– Суруллубут — суоруллубат. Бу кинигэни үйэ-саас тухары биһиги кэнчээри ыччаттарбыт, сарсыҥҥы эрэллээх оҕолорбут хайаан да көрүөхтэрэ-истиэхтэрэ, элбэҕи үөрэтиэхтэрэ диэн улахан эрэллээхпит, – Майа сэлиэнньэтин баһылыга Алексей Неустроев кинигэҕэ үлэлэспит дьоҥҥо истиҥ махталын тиэртэ.
Иван Лукин.
