Олоҥхо дэкээдэтин чэрчитинэн сыллата Нөөрүктээйи саҥа көлүөнэ бибилэтиэкэтин тэрийиитинэн Нөөрүктээйи олоҥхоһута Николай Петрович Старостин–Батаҥа Ньукулай аатынан уһуйаан иитиллээччилэригэр анаан биирдиилээн толорууга улуустааҕы куонкурус ыытылынна.
Тэрийээччилэр бэлиэтииллэринэн сыл ахсын кыттааччы ахсаана элбээн, олоҥхону толоруу сайдан иһэрэ үөрдэр. Маннык куонкурус биһиги улууспутугар оскуола иннинээҕи саастаах оҕолорго соҕотох. Быйылгы куонкурус бэйэтин тула улууспут 9 нэһилиэгиттэн 41 кырачаан кыттааччыны муста.
Түмүккэ Кылаан бирииһи Төҥүлүттэн «Олимпионик» уһуйаан иитиллээччитэ Оливия Борисова ылар чиэстэннэ.
5 саастаахтарга бастакы үрдэли Сардаана Васильева («Чуораанчык» уһуйаан, Майа), иккиһи Айсаар Иванов («Сказка», Аллараа Бэстээх), үсүһү Туйаарыма Куприянова («Кэнчээри», Майа), бастакы добун миэстэни Айаал Дмитриев («Сказка», Аллараа Бэстээх), иккиһи Арсений Егомин, үсүһү Амина Аргунова («Кэнчээри», Майа) ылары ситистилэр.
6 саастаахтарга бастакы үрдэли Денис Кудинов («Ньургуһун», Матта), иккиһи Айаана Верховцева («Мичил», Төхтүр), үсүһү Айсен Иванов («Кэнчээри», Майа), бастакы добун миэстэни Кеша Зыков («Мичээр», Павловскай), иккиһи Сайнаара Попова («Туллукчаан», Догдоҥо), үсүһү Владислав Протопопов (А.В.Чугунов аатынан оскуола-саад, Мэлдьэхси) ыллылар.
Кыайыылаахтар уонна бары кыттааччылар Н.П.Старостин‒Батаҥа Ньукулай аймахтарын уонна тэрийээччилэр ааттарыттан бириистэри туттулар. Үүнэр көлүөнэни иитиигэ, олоҥхону, саха төрүт култууратын иҥэрэр, үөрэтэр уһуйааччыларга, төрөппүттэргэ махталбытын биллэрэбит.
Эһиилги куонкурус саҥа ааттары бэлэхтиэҕэ диэн эрэнэбит. Олоҥхону, норуот тылынан уус-уран баайын үүнэр көлүөнэҕэ билиһиннэрии, тарҕатыы, иҥэрии барыбыт сыалбыт буолар.
Марина Сазонова, Нөөрүктээйи саҥа көлүөнэ бибилэтиэкэтин оҕо отделын сүрүннүүр бибилэтиэкэрэ.
