Олоҥхо диэн аан дойду хайдах айыллыбытын, Орто дойду олоҕо хайдах үөскээбитин кэпсиир сүдү эпическэй айымньы буолар.
Үйэлэри уҥуордаан кэлбит саха норуотун тылынан уустаан-ураннаан, тойук туойан үс дойду олоҕун кэпсиир героическай эпоһа олоҥхо 2005 с. Аан дойду барҕа баайа буолбута. Норуот сүдү баайын олоҥхону уһуйаан оҕолоруттан саҕалаан үөрэтэн, үйэтитэр, сайыннарар үлэлэр бары араҥаҕа киэҥник ыытыллаллар.
Сылын ахсын өрөспүүбүлүкэ үрдүнэн сэтинньи 25 күнүттэн Олоҥхо дэкээдэтэ ыытыллар. Ол чэрчитинэн, сэтинньи 26 күнүгэр И.М.Сосин аатынан улуустааҕы киин бибилэтиэкэҕэ сахалыы таба суруйууну сайыннарар, олоҥхо баай тылын-өһүн кэҥэтэр сыаллаах «Олоҥхо дьыктаана-2024» ыытылынна. Манна 14 киһи кыттыыны ылла. Ааҕар саала кылаабынай бибилэтиэкэрэ Марина Трифонова Олоҥхо дэкээдэтэ арыллыбытынан дьыктаан кыттыылаахтарын эҕэрдэлээтэ.
Дьыктааны суруйуох иннинэ Гаврил Колесов толоруутугар “Дьулуруйар Ньургун Боотур” олоҥхоттон Орто дойду олоҕо олохтонуутун туһунан быһа тардыыны иһиттибит. Манна бэйэтин тус архыыбыттан олоҥхо диискэлэринэн ааҕааччы Марфа Алексеева бибилэтиэкэҕэ көмөлөспүт.
Сыллата буоларын курдук, дьыктааны И.Г.Тимофеев аатынан Майа лиссиэйин саха тылыгар уонна литературатыгар учуутала Тамара Слободчикова суруйтарда. Кини Былатыан Ойуунускай “Дьулуруйар Ньургун Боотур” олоҥхотуттан быһа тардыыны дорҕоонноохтук уонна хомоҕойдук аахта. Бу кэннэ Марина Егоровна дьыктаан кыттыылаахтарыгар, о.и. куруутун көхтөөхтүк кыттар Анастасия, Василий Алексеевтар дьиэ кэргэҥҥэ Туоһу суруктары үөрүүлээхтик туттарда.
Олоҥхо дойдутун дьоно, олоҥхону ааҕыҥ, олоҥхоһуттары истиҥ, сэргээҥ.
Марелла Баишева.
