Ахсынньы 7 күнүгэр Аллараа Бэстээххэ Р.И. Брызгалов аатынан Тырааныспар техникумун уораҕайыгар биир дойдулаахпыт, тумус туттар киһибит, педагогическай билим кандидата, доцена, Арассыыйатааҕы естественнай билим академиятын бочуоттаах профессора Галина Семеновна Попова-Санаайа 75 сааһыгар аналлаах «Тыын. Удьуор тыына. Тыын кут туурата өйдөбүлү уонна тиэкиһи токкоолооһун» Бүтүн Арассыыйатааҕы билим-быраактыка кэмпириэнсийэтэ киэҥ далааһыннаахтык ыытылынна.
Кэмпириэнсийэ үөрүүлээх аһыллыытын Нуораҕана нэһилиэгиттэн эдэр алгысчыт Денис Оконешников алҕаан арыйда, оһуокайдаан биир ситимҥэ киллэрдэ. Г.С.Попова-Санаайа саха күннээҕи олоҕун-дьаһаҕын, үгэһин сыл хаамыытынан сааһылаан, толкуйдаан, торумнаан оҥорбут “Үгэс сыллааҕы эргииринэн” саҥа үүммүт Билгэ ыйбыт сиэрин-туомун Нөөрүктээйи нэһилиэгин орто оскуолатын уһуйааччыларын түмсүүтэ (сал. Светлана Пудова) оҥордо.
Ытыктабыллаах Галина Семеновна-Санаайаны 75 сааһын туолбут өрөгөйдөөх үбүлүөйүнэн Мэҥэ Хаҥалас улууһун баһылыгын социальнай уонна имиджевэй бэлиитикэҕэ солбуйааччыта Альбина Григорьева эҕэрдэлээтэ уонна «Мэҥэ Хаҥалас улууһун социальнай-экономическай сайдыытыгар кылаатын иһин» түөскэ анньыллар бэлиэни кэтэртэ. Мэҥэ Хаҥалас улууһун култуураҕа уонна духуобунай сайдыыга управлениетын салайааччыта Анна Исакова эҕэрдэлээтэ. Г.Г. Колесов аатынан оройуоннааҕы «Олоҥхо дьиэтэ» норуот айымньытын киинин уус-уран салайааччыта Айта Семеновна Васильева эҕэрдэлээтэ уонна «Үйэлээх үгэһи үксэтээччи» Олоҥхо дьиэтин үрүҥ көмүс түөскэ анньыллар бэлиэтин кэтэртэ. СӨ «Олоҥхо ассоциацията» уопсастыбаннай түмсүүтүн бэрэсидьиэнэ Февронья Шишигина, вице-бэрэсидьиэнэ Елена Протодьяконова эҕэрдэлээтилэр.
Куйаар ситиминэн истиҥ эҕэрдэлэрин М.К.Аммосов аатынан ХИФУ Бэрэсидьиэнэ Евгения Михайлова, М.К.Аммосов аатынан ХИФУ үөрэх методикатын үлэтигэр проректора Алексей Голиков ыыттылар, ХИФУ норуоттар тылларын уонна култуураларын үөрэтэр институтун дириэктэрин билим-чинчийэр үлэҕэ солбуйааччыта Матрена Попова эҕэрдэлээтэ уонна СӨ Ил Дарханын ыйааҕынан «Гражданскай килбиэн» түөскэ анньыллар бэлиэтин кэтэртэ.
Ытыктабыллаах Галина Семеновнаны-Санаайаны биир дойдулаахтарын аатыттан 1 Тыыллыма нэһилиэгин баһылыга Руслан Афанасьев эҕэрдэлээтэ. Санаайаҕа ылбаҕай ырыатын СӨ култууратын туйгуна, Саха судаарыстыбаннай опера уонна балет тыйаатырын солиһа Иннокентий Огочонов бэлэхтээтэ.
Кэмпириэнсийэ үөрүүлээх арыллыытын кэннэ бука бары кыттааччылар тоҕус хайысханан ийэ тыл, айдарык арыллыытыгар, алаас култууратыгар, итэҕэл тыыныгар, олоҥхо эйгэтигэр, о.д.а. ис хоһоонноох тиэмэлэргэ сурукка тиһэн аҕалбыт үлэлэрин сырдатан, анаммыт хайысхаларынан тарҕаһан дириҥ хорутуулаах, ырытыылаах үлэ барда. Күн иккис аҥаарыгар тэрээһин пленарнай чааһа ыытылынна, түмүк таһаарылынна.
Айта Васильева,
Гаврил Колесов аатынан Олоҥхо дьиэтин уус-уран салайааччыта.
