Ахсынньы 18 күнүгэр Майаҕа И.М.Сосин аатынан киин бибилэтиэкэҕэ биир кэрэ-бэлиэ күн үүннэ. Саха сирин Суруйааччыларын сойууһун чилиэнэ, өрөспүүбүлүкэтээҕи “Иэйии”, Мэҥэ Хаҥалас улууһун “Таммахтар” литературнай холбоһуктар чилиэннэрэ, үлэ бэтэрээнэ Инна Николаева-Угинка “Ойуур суолларынан” саҥа кинигэтэ сүрэхтэннэ.
Бу кини 10-с кинигэтэ буолар. Кинигэ Дьокуускайга ““Дани-Алмаас “компания” ХЭТ-ҕэ 200 ахсаанынан бэчээттэммит. Манна ааптар орто сүһүөх оскуола оҕолоругар анаан булчут, табаһыт дьон дьиҥнээх олоххо буолбут умсугутуулаах кэпсээннэрин киллэрбит. Оҕо бу кинигэттэн айылҕа, булт-алт кистэлэҥнэрин, сиэри-туому, төрүт үгэстэри билиэҕэ.
Саҥа кинигэ сүрэхтэниитигэр Дьокуускайтан “Иэйии”, улууспутуттан “Таммахтар”, Майаттан “Айар Майа” литературнай холбоһуктар чилиэннэрэ, “Таммахтар” литературнай холбоһук сүбэһитэ, суруйааччы Августина Владимирова-Хабарова, “Майа кийииттэрэ” түмсүү чилиэнэ Ариадна Филиппова, Алдан Кутанатыттан, Майаттан аймахтара ыалдьыттаатылар. Үөрүүлээх күнү “Таммахтар” холбоһук салайааччытын солбуйааччы Изабелла Романова иилээн-саҕалаан ыытта. Тэрээһин кыттыылаахтара суруйааччы кинигэлэрин быыстапкатын сэҥээрэн көрдүлэр, ол кэннэ минньигэс, толору астаах сандалы тула олорон суруйааччы биографиятыттан саҕалаан айар үлэтин туһунан сырдатыыны сиһилии иһиттилэр.
Алдантан төрүттээх Инна Николаева 22 сыл устата Майатааҕы “Мичил” оҕону сайыннарар киин иитээччитинэн үлэлээбитэ. Кини оҕолору кытта үлэлии сылдьан оҕолорго аналлаах сахалыы хоһоон аҕыйаҕын бэлиэтиир. Онон кырачааннарга аналлаах хоһооннору бэйэтэ суруйан үлэтигэр туттар буолбут. Бу күн “Мичил” кырачаан иитиллээччилэрэ уонна иитээччилэрэ суруйааччы Инна Николаева-Угинка хоһооннорун аахтылар. Уһуйаан дириэктэрэ Виктория Бурнашева биир идэлээҕин эҕэрдэлээтэ. “Иэйии” өрөспүүбүлүкэтээҕи литературнай түмсүү салайааччыта Илья Афанасьев-Алмаас суруйааччы Инна Николаева-Угинка хоһооннорунан кыра оҕолорго хоһоон уонна уруһуй куонкурустара биллэриллэн, 900-тэн тахса оҕону хабан кытыннарбыттарын сырдатта.
М.И.Брызгалова аатынан Майатааҕы оҕо бибилэтиэкэтин дириэктэрэ Ольга Дьяконова: “Мин Инна Николаевнаны билбитим ыраатта, оҕо уһуйааныгар үлэлиир сылларыгар оҕолору аҕалан-илдьэн куонкурустарга, ааҕыыларга кытыннарара, хас саҥа тахсыбыт бэйэтин кинигэтин бибилэтиэкэҕэ бэлэхтээн, пуондабытын хаҥатан кэллэ. 2020 с. “Сайдам” кинигэ кыһатыгар тахсыбыт “Үлэһит бэрдэ буолларбын” диэн кинигэтигэр оҕону идэҕэ туһаайыыга туһалаах кинигэ диэн киирии тылын суруйбутум, кини кинигэлэрин өрүү сэргээн ааҕабын. Урукку өттүгэр оҕолорго, төрөппүттэргэ, уһуйааччыларга анаан суруйарын билэр эбит буоллахпына, бу “Ойуур суолларынан” саҥа кинигэтин ааҕан баран оҕолорго суруйар кэпсээнньит быһыытынан кинини бэйэбэр арыйдым. Оҕолору бэйэбит холобурбутунан айылҕаҕа чугаһатан иитэрбитигэр, улахан да дьоҥҥо бу кинигэ билбэппитин билэрбитигэр туһалаах буолуоҕа. Холобур, сыыс кустар диэни мин билбэт этим. Хоту кус арааһа элбэх буолан, моонньоҕоннору, көҕөннөрү, халбалары, чыккымайдары итинник ааттыыллар эбит. Суруйааччы “Айылҕабытыгар амарахтык сыһыаннаһан олордохпутуна, инникитин кэлэр көлүөнэҕэ утары уунарбыт баар буолуоҕа дии саныыбын” диэн бэлиэтиир. Онон биһиги ыччаппытыгар тугу эмэ хаалларыахпытын баҕарар буоллахпытына айымньылар нөҥүө оҕолорбутугар элбэҕи кэпсээн, бэйэбит холобур буоламмыт, айылҕаҕа чугаһатан илдьэ сылдьан иитэбит-үөрэтэбит.
М.И.Брызгалова аатынан Майатааҕы оҕо бибилэтиэкэтигэр, “Мичил” оҕону сайыннарар кииҥҥэ, таас дьиэлэри тутар “Мэҥэ Тутуу” тэрилтэҕэ анаан өрөгөй ырыалар хоһооннорун айбыта. Кинигэ ойуунан киэргэтиитэ кэпсээннэр ис хоһооннорун ситэрэн-хоторон биэрэр. Биир дойдулаахпыт, биллиилээх эколог суруйааччы, “Таммахтар” литературнай холбоһук сүбэһитинэн сылдьыбыт И.М.Сосин айар үлэтин салгыыр киһи баар буолбут диэн долгуйа бэлиэтиибин. Бу “Ойуур суолларынан” кинигэни оҕолор төрөппүттэриниин ааҕан билиилэрин-көрүүлэрин кэҥэтиэхтэрэ, өйдөрүгэр-санааларыгар иҥэриэхтэрэ уонна олохторугар туһаныахтара диэн бигэтик эрэнэбин”, – диэн туран үтүө баҕа санааларын эттэ итиэннэ Иван Сысолятин тылларыгар, Валерий Ноев матыыбыгар “Кыракый уолчааным” ырыанан эҕэрдэлээн туран саха тылын быһаарыылаах тылдьытын бэлэх уунна.
Любовь Парилова (Николаева) кинигэҕэ уруһуйдарын уонна бэйэтин туһунан сырдатта. Бу кини бастакы үлэтэ буолар эбит, инникитин бииргэ элбэхтэ үлэлиэхпит саҥаспыныын диэн эрэннэрдэ.
Саҥа кинигэ сүрэхтэниитин кыттыылаахтара бары ааптар Инна Николаева-Угинка айылҕаттан айдарыылаах хоһоонньут буоларын, нууччалыы тылынан суруйбут хоһоонноро Арассыыйа таһымнаах сурунаалларга тиийэ бэчээттэнэллэрин бэлиэтээн эттилэр.
Бу күн кинини оҕолоро истиҥник-иһирэхтик эҕэрдэлээн туран сибэкки дьөрбөтүн ыыппыттар. Суруйааччы Инна Николаева-Угинка кинигэтигэр күүс-көмө буолбут дьонугар бэйэтин бэлэхтэрин туттарда. Кини айар үлэнэн үлүһүйэн элбэхтик суруйарыгар кэргэнэ, 3 оҕотун тапталлаах аҕата, эһээ буолбут СӨ үтүөлээх тутааччыта Иван Николаевич Николаев күүстээх өйөбүл буоларыгар улаханнык махтанарын бар дьонугар эттэ.
Марелла Баишева.
