Олунньу 28 күнүгэр Д.Ф.Ходулов аатынан Култуура дьиэтигэр улуустааҕы оҕо уһуйаанын оскуолаҕа киириэн иннинээҕи иитиллээччилэригэр фитнес-аэробикаҕа куонкурус буолла.
Үс бөлөҕүнэн 19 хамаанда кытынна. Куонкуруһу улуустааҕы үөрэх управлениета уонна Майатааҕы «Чуораанчык» оҕо уһуйаана тэрийдилэр. Дьүүллүүр сүбэҕэ өрөспүүбүлүкэтээҕи фитнес-аэробика иккис категориялаах судьуйата, Ф.Г.Охлопков аатынан Майа орто оскуола физкултуураҕа учуутала Любовь Борисова, улуустааҕы фитнес-аэробика федерациятын дириэктэрин солбуйааччы, «Кыталык» ансаамбыл уус-уран салайааччыта, улуустааҕы фитнес-аэробика сүүмэрдэммит хамаандатын тириэньэрэ Александра Соловьева, Хорообуттан «Күн кыырпахтара» сүүмэрдэммит хамаандатын тириэньэрэ, фитнес-аэробика федерациятын чилиэнэ Нюрбина Брызгалова үлэлэмтилэр.
Бастакы бөлөххө кыайыыны Майаттан «Чуораанчык» уһуйаан иитиллээччилэрэ ылары ситистилэр. Иккис миэстэни Майаттан «Мичил», үсүһү Майаттан «Кэнчээри» ыллылар.
Иккис бөлөххө бастакы миэстэҕэ Маттаттан «Ньургуһун», иккискэ Төхтүртэн «Мичил», үһүскэ Майаттан «Сардаана» таҕыстылар.
Үһүс бөлөх кыайыылааҕынан 1-кы Тыыллыматтан «Күнчээн» бөлөх ааттанна. Иккис миэстэ Нөөрүктээйиттэн «Лена», үһүс Т.Г.Десяткин аатынан Тумул орто оскуола иһинээҕи уһуйаан буоллулар.
Ольга Осипова, Майатааҕы «Чуораанчык» оҕо уһуйаанын салайааччыта: “Оҕолорбут уулатаннар, чөл олоҕу тутуһан, успуорка куруук инники сылдьалларыгар олугу уурабыт”, – диэн санаатын үллэһиннэ.
