“Новостройдар” аахсыйа-кэнсиэри астыннылар

Сүгүрүйэбит саа-саадах тутан Ийэ дойду көмүскэлигэр сырдык тыыннарын толук уурбут буойуннарга, махтанабыт, айхаллыыбыт тыылга хаалан күүстэрин-күдэхтэрин үлэ фронугар анаабыт сэрии сылын оҕолоругар!

Улуу Кыайыы 79 сылын бэлиэтиир өрөгөйдөөх күн Майа сэлиэнньэтин “Новострой” түөлбэтигэр “Тиэргэнинэн ыллыыбыт” диэн Бүтүн Арассыыйатааҕы аахсыйаҕа кыттыһан Д.Ф.Ходулов аатынан култуура киинин уонна олохтоох дьаһалта көҕүлээһиннэринэн кэнсиэр ыытылынна. Үөрүүлээх күнүнэн олохтоохтору Майа сэлиэнньэтин баһылыгын социальнай уонна имиджевэй бэлиитикэҕэ солбуйааччы Вячеслав Санников эҕэрдэлээтэ:

  • Күндү бэтэрээннэрбитин, “Новострой” түөлбэ олохтоохторун, бары манна кэлбит дьоммутун Майа олохтоох дьаһалтатын аатыттан Улуу Кыайыы 79 сылынан итиитик-истиҥник эҕэрдэлиибин!

Бүгүн биһиги Улуу Кыайыыны уһансыбыт бэтэрээннэрбитигэр сүгүрүйүөх уонна махтаныах тустаахпыт. Биһиги Майабыт сэлиэнньэтигэр күн бүгүн 20 тыыл бэтэрээнэ, ол иһигэр 1 сэрии кыттыылааҕын огдообото уонна 120 сэрии сылларын оҕолоро олороллор. Бу бэлиэ күн бастакы аҥарыгар “Кыайыы оптуобуһа” аахсыйа тэрийэн биһиги тыыл бэтэрээннэрбитин, сэрии сылын оҕолорун илдьэ сылдьаммыт Кыайыы монуменыгар уонна Сэбиэскэй Сойуус Дьоруойа Ф.К.Попов искибиэригэр улууспут итиэннэ Майабыт дьаһалталарын кытта сибэкки дьөрбөтүн ууруутугар, үөрүүлээх миитиҥҥэ кытыннардыбыт, бэтэрээннэрбитин сэлиэнньэ кэрэ-бэлиэ миэстэлэринэн күүлэйдэттибит. Бу күн иккис аҥаарыгар Майа арҕаа уонна илин өттүлэригэр “Кыайыы ырыалара” тэттик кэнсиэри тэрийэ сылдьабыт. Бүгүҥҥү аахсыйаҕа кытта кэлбит бар-дьоммутугар махтанабыт.

Кыайыы ырыаларынан аахсыйа-кэнсиэргэ кыттыыны ыллылар СӨ култууратын үтүөлээх үлэһитэ Сардаана Осипова, Екатерина Ефремова, Дмитрий Иванов, Линда Захарова, Вячеслав Санников, Степан Копырин, Ф.Г.Охлопков аатынан Майатааҕы орто оскуола 6-с “а” кылааһын үөрэнээччилэрэ.

Аахсыйа-кэнсиэри Галина Эверстова иилээн-саҕалаан үрдүк таһымнаахтык ыытта.

Улуу Кыайыы өрөгөйдөөх күнүнэн тэриллибит тэрээһинтэн эдэрдиин-эмэнниин тоҕуоруһа мустубут түөлбэ олохтоохторо үөрэн-астынан, тэрийээччилэргэ махтанан тарҕастылар.

 

Марелла Баишева.