Саха Өрөспүүбүлүкэтин биир биллиилээх, киэн туттар киһитэ, Аҕа дойду Улуу сэриитин кыттыылааҕа, РСФСР үтүөлээх юриһа, уопсастыбаннай диэйэтэл, норуодунай судьуйа Михаил Михайлович Сотников 100 сылыгар анаан улууска дэкээдэ ыытылла турар.
Бу чэрчитинэн, Майаҕа Р.Г. Васильев аатынан кыраайы үөрэтэр түмэлгэ бүгүн, ахсынньы 16 күнүгэр, Аҕа дойду Улуу сэриитин кыттыылааҕа, РСФСР үтүөлээх юриһа, уопсастыбаннай диэйэтэл, норуодунай судьуйа Михаил Михайлович Сотников сырдык аатын үйэтитэр быыстапка арыллыыта буолла.
Тэрээһин үөрүүлээх чааһыгар Майа дьаһалтатын баһылыгын солбуйааччы Март Андреев, Мэҥэ Хаҥалас улууһун оройуоннааҕы суутун судьуйата Вера Саввина, Саха Өрөспүүбүлүкэтин үрдүкү Ытык Сүбэтин чилиэнэ, улуус бочуоттаах олохтооҕо Василий Эверстов, уопсастыбаннас уонна Майатааҕы В.П.Ларионов аатынан оскуола оҕолоро кыттыыны ыллылар.
“Ытык киһи олоҕун сэһэнэ” быыстапканы арыйар кыһыл лиэнтэни үөһээ ааттаммыттары сэргэ, Михаил Михайлович төрөппүт уола Егор Сотников быстылар. Бу кэннэ ыалдьыттарга норуодунай судьуйа олоҕун арыйар, үлэтин-хамнаһын сырдатар дириҥ устуоруйалаах быыстапканы мусуой экспозицияҕа исписэлииһэ Михаил Трифонов сиһилии сырдатта.
РСФСР “Знание” уопсастыбатын чилиэнэ, улууска ат сүүрдүүтүн көҕүлээччи, федерация салайааччыта, Саха АССР Орджоникидзевскай оройуонун дьокутаата буолбут, үөрэҕин, үлэтин докумуоннара, наҕараадалара стеллажка ууруллубуттар.
Бар дьоно М.М. Сотниковы олоххо көхтөөх позициялаах, дьону түмэр, кэскиллээх дьыалаҕа көҕүлээччи быһыытынан сыаналыыллар. Саахымакка оройуон чөмпүйүөнэ, аан дойду чөмпүйүөнэ Анатолий Карповтыын сеанска тэҥнэһиитэ – кини бу көрүҥҥэ уһулуччу дьоҕурдааҕын туоһулуур. Ону тэҥэ, үчүгэй уруһуйдьут хартыыналара, о.д.а. туруоруллубуттар, слайданан үлэтэ-хамнаһа киэҥник сырдатылынна. Төрөөбүт түөлбэбит инникитин түстүүр кэнчээри ыччаппыт ытык киһи дьоһуннаах олоҕун кэрчиктэрин, бэлиэ түгэннэрин, уопсастыбаннай үлэтин кэпсиир быыстапкаттан элбэҕи көрдүлэр-биллилэр.
Бу күннэргэ быыстапка кэлэн көрөөччүлэргэ анаан турар.
Бэлиэ тэрээһини мусуой дириэктэрэ Михаил Масаха иилээн-саҕалаан ыытта.
Марелла Баишева.
