Ахсынньы 19 күнүгэр олохтоох бириэмэнэн киэһэ 18.00 чаастан Арассыыйа Бэрэсидьиэнэ Владимир Владимирович Путин 2024 сылы түмүктүүр улахан пресс-кэмпириэнсийэтэ күөх экраҥҥа быһа холбонуунан таҕыста. Пресс-кэмпириэнсийэ 4,5 чаас устата ыытылынна. Барыта 2,48 мөлүйүөн кэриҥэ боппуруос киирбит. Кэмпириэнсийэ кэмигэр Бэрэсидьиэн 76 боппуруоска эппиэттээтэ. Владимир Путин дойду олохтоохторо уонна суруналыыстар биэрбит араас хабааннаах экэниэмикэ, байыаннай дьайыы, эмсэҕэлээбит эрэгийиэннэри чөлүгэр түһэрии, бэлитиичэскэй быһыы-майгы, нэһилиэнньэҕэ социальнай көмөлөр, судаарыстыбаннай бырагыраамалар туолууларын боппуруостарыгар сиһилии эппиэттэри уонна быһаарыылары оҥордо.
Киирии боппуруостарга Бэрэсидьиэн дойдубут төһө даҕаны экэнэмиичэскэй сааҥсыйаҕа олордор производство уонна бырамыысыланнас сайдарын бэлиэтээтэ. Ол курдук оҥорон таһаарыы кэккэ салааларыгар 4,4%, перерабатывающай бырамыысыланнаска 8,1% үрдээһин тахсыбыт. Дойду үрдүнэн үлэтэ суох дьон бырыһыана 2,3 тэҥнэспитин, тыа хаһаайыстыбатыгар 3 бырыһыан эбиллиини, Аан дойдуга сэлиэһинэй бурдугу экспордааһыҥҥа бастакы миэстэҕэ сылдьарбытын, эт аһылыганан нэһилиэнньэ 100% бэйэбитин хааччынарбытын, үп-харчыга инфляция баарын үрдүнэн үлэһиттэр орто хамнастара 9 бырыһыаҥҥа тиийэ үрдээбит иһитиннэрдэ.
Арктика уонна Уһук Илин олохтоохторугар чэпчэтиилээх 2% ипэтиэкэ салҕанарын, 2 тыһыынчаттан кыра нэһилиэнньэлээх пууннарга социальнай объектар тутууларын госпрограммаҕа эбии киллэрэргэ, Арктика зонатыгар баар 25 куораттар агломерацияларын сайдыытын бырагыраамаларыгар киирбэтэх кыра нэһилиэнньэлэргэ сөптөөх көмөнү оҥорор дьаһаллары ылынарга диэн Владимир Владимирович Путин киирбит боппуруостарга эппиэт этиилэрин биһирии иһиттим.
Николай Тарасов, улуустааҕы үөрэх салататын исписэлииһэ.