Олунньу 19 күнүгэр нэһилиэнньэ социальнай көмүскэллээх буолуутун улуустааҕы кэлим киинин кытта нэһилиэк баһылыктарын, дьаһалталар исписэлиистэрин, социальнай үлэһиттэрин кытта сэминээр буолла.
Тэрээһин Майа сэлиэнньэтин дьаһалтатыгар уонна «Дьол түһүлгэтэ» уопсастыбаннай кииҥҥэ тэҥинэн ыытылынна. Сэминээргэ 2024 сылга ыытыллыбыт үлэлэр түмүктэрин, ситиһиилэри, бэлиэтээһиннэри ырытыстылар уонна быйылгы сылга сыалы-соругу, сокуоҥҥа уларыйыылары, үлэҕэ-хамнаска саҥа хайыскалары билиһиннэрдилэр.
Иван Шестаков, нэһилиэнньэ социальнай көмүскэллээх буолуутун улуустааҕы кэлим киинин салайааччыта:
– Дойдубут Бэрэсидьиэнэ Владимир Путин, өрөспүүбүлүкэ Ил Дархана Айсен Николаев этиилэринэн, сүрүннүүр сыал, болҕомто демографияҕа ууруллар. Ол курдук, элбэх оҕолоох дьиэ кэргэттэр уонна кыаммат араҥа ахсааныгар сылдьар дьон дьарыктаах буолууларыгар, дохуоттарын үрдэтиигэ элбэх үлэ ыытыллар. Билиҥҥи кэмҥэ төрөппүтэ суох хаалбыт тулаайах оҕолору, кыаммат кырдьаҕастары эппиэкэҕэ ылыы, «приемнай дьиэ кэргэни» тэрийии боппуруостара сытыытык тураллар.
Бу ааспыт сылга биһиги кииммит иһинэн доруобуйаларынан хааччахтаах оҕолор туруктарын тупсарарга микрореабилитационнай киин аһылынна. Быйыл өссө кииммит иһинэн элбэх хайысхалаах дьиэ кэргэн киинэ үлэтин саҕалыахтаах. Сыл бүтүүтэ Маттаҕа аныгы усулуобуйаҕа эппиэттиир 51 миэстэлээх кырдьаҕастар дьиэлэрэ үлэҕэ киирэрэ былааннанар, онуоха билигин хаадырынан хааччыыйы боппуруоһа быһаарылла турар, — диэн иһитиннэрдэ.
Иван Лукин.
