Бу ыйытык бүгүн улуус баһылыгын быйылгы сыллааҕы отчуотун мунньаҕар Догдоҥо нэһилиэгэр киирдэ. Итини сэргэ олохтоохтор Бөкөҕө, Сотоҕо диэри суол аспаллааныытын, оҕо саадыгар саҥа тутууну эбэтэр хапытаалынай өрөмүөнү, оҕо саадыгар харабылга эбии ыстаат көрүллэрин, култуура киинигэр хорегораф исписэлииһин, чааһынай дьиэлэри кииннэммит уунан хааччыйыыга холбууру туруорустулар. Ханна да буоларын курдук, улууспутугар сүрүн дьарыкпыт тыа хаһаайыстыбата буоларынан, үгүс ыйытыы бу салааҕа киирдэ. «Манчаары» кэпэрэтиип иэһин төлөһүүтэ хайдах баран иһэрин итиэннэ сүөһүгэ көрүллэр көмө харчынан туһаммат дьон үүт туттараллара көҥүллэниэ, түргэнник сытар салааны сайыннарыыга, «Союз» СПОК тыраахтар атыылаһарыгар улуустан көмө үбүлээһин көрүллүө дуо диэн ыйыталыстылар. Догдоҥолор кэтэх хаһаайыстыбаларыгар сүөһүлэрин ахсаана ‒ 297, сылгылара ‒ 108, бааһынай хаһаайыстыбатыгар сүөһүлэрэ ‒ 115, сылгылара ‒363. Бу көрдөрүүлэри ааспыт уонна иллэрээ сыллары кытары тэҥнээтэххэ, быйыл эбиллии баара бэлиэтэнэр.
Оскуола үлэһитэ Федора Карамзина үүт соҕотуопкалааччыларга туттарар үүттэрин сыатын бырыһыанын кытары ордук сайыҥҥы өртүгэр сөпсөспөттөрүн, нэһилиэк оҕо саадын ыстаарсай иитээччитэ Аксинья Морозова оскуола үлэһиттэриттэн хамнастара улахан араастаһыылааҕынан үрдэтэргэ, нэһилиэк баһылыгын солбуйааччыта Аскольд Винокуров нэһилиэккэ икки нэһилиэнньэлээх пуун киирсэринэн инникитин ону учуоттаан үбүлээһини көрөллөрүгэр санааларын эттилэр.
Догдоҥо нэһилиэгэр 281 киһи олорор. Нэһилиэк олохтоохторун орто сааһа ‒ 34. Оскуолаҕа үөрэнээччи ахсаана ‒ 32, оҕо саада 11 иитиллээччилээх.
Улуус баһылыгын сыллааҕы үлэтин отчуоттуур мунньаҕар 48 киһи кытынна. Нэһилиэк баһылыга Петр Сивцев олохтоохторго көхтөөх кыттыыларыгар махтанна уонна инникитин да нэһилиэк, улуус сайдыытыгар биир сүбэнэн үлэлииргэ ыҥырда.
Алена ДОКТОРОВА.
