Тохсунньу 22 күнүгэр оройуон баһылыгын отчуота Нөөрүктээйи нэһилиэгэр туруорулунна.
Мунньаҕы нэһилиэк баһылыга Николай Федоров ииллээн-саҕалаан ыытта. Оройуон баһылыга Дмитрий Тихонов үлэтин отчуотун, байыаннай дьайыыга туох көмөлөр оҥоһуллубуттарын нэһилиэктэн 110 киһи иһиттэ.
Олохтоохтор ОДьКХ гаас хочуолунайын тарыыба, төлөбүрэ тоҕо үрдэтиллибитин, нэһилиэк иһинээҕи суолу өрөмүөннүүр, сырдатар үлэ хаһан ыытылларын, элбэх оҕолоохтор уһаайбаны ылыыга уочараттара хайдах хамсыырын хаһан билиһиннэрэллэрин, «Парус» комплекс кырдьаҕас дьоҥҥо ханнык чэпчэтиилэри көрөрүн, улууска төһө быраас тиийбэтин ыйыталастылар. Электроуот лииньийэтин хаһан өрөмүөннүүллэрин, маҕаһыыннарга сыананы хонтуруоллуур үлэ тоҕо ыытыллыбатын, гаас төлөбүрүгэр көмө харчы баарын-суоҕун, остуолбаҕа туруоруллубут электроуот счетчигын көрдөрүүтүн туһунан мунаарар боппуруостарын таарыйдылар. Улууска буруйу оҥоруу туругун, суут хаамыыта тоҕо аҥаардас нууччалыы ыытылларын сурастылар.
Иван Лукин.
