Олунньу 28 күнүгэр Балыктаах орто оскуолатыгар «Настаабынньык эдэр педагогтардыын айымньылаах үлэтин тиһигэ» диэн С.Н.Донской II аатынан үөрэх сайдыытын уонна учууталлар идэлэрин үрдэтэр институт уонна Балыктаах орто оскуолатын нуучча тылын уонна литературатын учуутала, Ил Дархан бириэмийэтин «Бастыҥ настаабынньык» кыайыылааҕа Ангелина Николаевна Говорова холбоһуктаах өрөспүүбүлүкэтээҕи сэминээр тэрилиннэ.
Бу күн араас улуустартан барыта 70 педагог кэлэн кыттыыны ылла. Сэминээр сыала-соруга: настаабынньыстыба ‒ эдэр педагогу кытта үлэни тобулуу, эдэр педагогтар инники үлэлэригэр араас тосхолору киллэрии буолар. Тэрээһиҥҥэ ыраахтан-чугастан кэлбит ыалдьыттары олохтоохтор үөрэ-көтө көрүстүлэр. Томпо, Уус Алдан, Чурапчы, Нам улуустарыттан, Дьокуускай куораттан, улууспут нэһилиэктэриттэн Дьабыыл, Бэдьимэ, Тыыллыма, Аллараа Бэстээх, Тиэлиги, Алтан, Матта, Чүүйэ, Табаҕа, Майа, Мэлдьэхси, Догдоҥо оскуолаларын учууталлара кэлэн кыттыыны ыллылар. Тэрээһин үөрүүлээх чааһын М.П.Габышев аатынан орто оскуолатын эдэр учууталлара иилээн-саҕалаан ыыттылар. Салгыы дириэктэри иитэр-үөрэтэр үлэҕэ солбуйааччы Надежда Осипова, улуус үөрэҕирии управлениетын исписэлииһэ Любовь Васильева, олохтоох оскуола эдэр педагогтарын түмсүүтүн салайааччыта Ангелина Говорова, С.Н.Донской II аатынан үөрэх сайдыытын уонна учууталлар идэлэрин үрдэтэр институт преподователэ Варвара Аммосова алгыс тылларынан сэминээр үөрэҕэ саҕаланна.
Аныгылыы «вертушка» ньыматынан эдэр дьон хамаандаларга арахсан алта хайысханан сонун үөрэхтэри иһиттилэр, билиилэрин эбиннилэр. Учууталлар Евдокия Стручкова, Татьяна Стручкова «Бэйэ бэйэни хаҥатыһыы», Нелли Бродникова, Айаал Кривошапкин, Петр Тарабукин, «Олохтоох оскуола виртуальнай мусуойа», Хаарчаана Алексеева, Наина Слободчикова «Саҥатык цифровой технологиялары туһаныы», Яна Габышева «Педагог идэтинэн үүнүүтэ-сайдыыта», Парасковья Мохначевская «Архитектура эйгэтигэр оҕону уһуйуу», Любовь Захарова «Үөрэтии аныгылыы ньымата» диэн үлэлэрин туһунан билиһиннэрдилэр. Эдэр педагогтары үөрэхтэрин быыһыгар оскуола эдэр физрук учууталлара тэрийиилэринэн спортсаалаҕа физкульт тохтобулга сынньанан ыллылар.
Итини сэргэ настаабынньыктарга туһунан үөрэх ыытылынна. Ол курдук, Ангелина Говорова оскуола эдэр педагогтарын оскуолатын хайдах салайан үлэлэтэрин, олохтоох култуура киинин дириэктэрэ Любовь Кычкина эдэр учууталлар нэһилиэк олоҕор кыттыыларын, Светлана Габышева кылаас салайааччытын утумнаах үлэтин, Александра Габышева ураты истииллээх «Мозаика» маастар-кылааһы, Варвара Аммосова аныгылыы үөрэх бырайыактарын хайдах оҥоруохха сөбүн туһунан иһитиннэрбитин кэлбит ыалдьыттар олус сэҥээрэн иһиттилэр. Күн иккис аҥарыгар эдэр педагогтарга» реверсивнай настаабынньыстыба» мадьыал тула биэс хайысханан арахсан бырайыак көмүскээтилэр: «Настаабынньык ‒ эдэр педагог», «Эдэр педагог-настаабынньык», «Учуутал ‒ үөрэнээччи», «Үөрэнээччи-учуутал», «Үөрэнээччи-үөрэнээччи». Түмүккэ оҥорбут бырайыактарын көмүскээтилэр уонна бэйэлэрин икки ардыларыгар санааларын үллэһиннилэр. Истиҥ эйгэҕэ эдэр дьоммут сүрдээх кэскиллээх бырайыагы оҥорон таһааран мустубут дьону кэрэхсэттилэр.»Төгүрүк остуолга» үлэ уопутун атастаһыы тула кэпсэтии буолла. Сэминээргэ кэлэн кыттыбыт дьон Балыктаах оскуолатын утумнаах үлэтин,эдэр педагогтар сатабылларын инники үлэлэригэр туһаныы туһунан бэлиэтээн эттилэр. Бу курдук уопуттаах педагог Ангелина Говорова үлэлэрин саҥа саҕалыыр эдэр коллегаларыгар утумнаахтык,сыратын харыстаабакка сүбэлээн, учуутал чэпчэкитэ суох үлэтин баһылыылларыгар олук уурсан үлэлии-хамсыы сылдьар уонна бэйэтин үлэтин уопутун үөрэ-көтө үллэстэр.
Мария Захарова.
