Тохсунньу 31 күнүгэр Нам улууһун киинигэр М.К.Аммосов аатынан култуура уонна духуобунай сайдыы дыбарыаһыгар Уһуйааччы уонна Аҕа сүбэҺит сылын түмүктүүр өрөспүүбүлүкэтээҕи тэрээһин буолан ааста. Манна 120 ыҥырыллыбыт киһи бары кэлбиттэр. Ыалдьыттары сахалыы сиэринэн алаадьынан айах тутан, саха төрүт астарынан, собо миининэн күндүлээн көрүстүлэр. Тэрээһин кыттыылаахтара Түбэ нэһилиэгиттэн Марита Сивцева «Собо бырайыагын” сэргээтилэр. Ааптар муҥха тэриллэрин, нэһилиэк тарбаҕар дьоҕурдаах дьоннорун собо балык оҥоһуктарын көрдөрдө, собо балык туһунан кэпсээтэ.
Нэһилиэктэр настаабынньыктарын сэбиэттэрин сыллааҕы үлэлэрин отчуот-альбомнара көрдөрүүгэ туруоруллубуттар. Баараҕай дыбарыас устун экскурсия тэрилиннэ. Аныгылыы тэриллибит улуустааҕы кииннэммит бибилэтиэкэни, Гражданскай турук аахталарын суруйуу дьиэтин, П.И.Сивцев аатынан устуоруйа уонна этнография түмэлин, о.д.а. сөҕө-махтайа көрдүлэр.
Пленарнай чаас мунньаҕын Нам улууһун Аҕа сүбэһиттэрин сэбиэтин салайааччы Анастасия Заболоцкая иилээн-саҕалаан ыытта, сыллааҕы үлэни отчуоттаата. 2023 с. тохсунньу 20 күнүгэр Нам улууһун 18 нэһилиэгэр настаабынньык сэбиэттэрэ тэриллэн үлэлэрин былааннаахтык саҕалаабыттара. Бу уопсастыбаннай тэрилтэлэртэн уратыта диэн сүбэ-ама биэрэр, олох үтүө үгэстэригэр уһуйар тэрилтэ буолар. Манна ааспыт өттүгэр ситиһиилээхтик үлэлээбит дьон киирэннэр үлэлииргэ чэпчэки. Настаабынньык сэбиэтэ нэһилиэк дьаһалталарын ыытар үлэлэригэр сүбэһит быһыытынан көмөлөөх тэрилтэ буолар. Сүрүн болҕомтону оҕону, ыччаты иитиигэ ууран уһуйааннартан саҕалаан үлэни саҕалаабыттар. Оҕолору сахалыы сиэргэ-туомҥа, өбүгэ үгэстэригэр үөрэтэллэр. Айылҕаны харыстыыр, ыраастыыр, о.д.а. кэскиллээх үлэлэри ыыталлар.
СӨ Ил Түмэн Судаарыстыбаннай Мунньаҕын бэрэссэдээтэлин солбуйааччы, байыаннай сулууспалаахтар, бойобуой дьайыы бэтэрээннэрин, патриотическай иитии уонна уопсастыбаннай тэриллиилэр дьыалаларыгар бастайааннай кэмитиэт бэрэссэдээтэлэ Александр Подголов, Ил Түмэн дьокутаата Елена Голомарева, СӨ настаабынньыктарын сэбиэтин салайааччы Анна Пермякова, өрөспүүбүлүкэ настаабынньыктарын сэбиэтин чилиэнэ, Нам улууһун кураатара Мария Габышева, “Чөл Саха Сирэ” уопсастыбаннай тэриллии салайааччыта, Аан дойдутааҕы арыгыттан туттунуу академиятын вице-бэрэсидьиэнэ, п.н.к. Матвей Лыткин, СӨ бааһынай хаһаайыстыбаларын уонна кэпэрэтииптэрин ассоциациятын толорооччу дириэктэрэ, СӨ ТХМ консультаана Зарема Бочкарева, М.К. Аммосов аатынан ХИФУ ПИ психология кафедратын профессора, п.н.к. Мария Прокопьева, “Көмүлүөк” хампаанньа генеральнай дириэктэрэ, СӨ дьахтар түмсүүтүн президиумун чилиэнэ Ольга Григорьева кыттыыны ыллылар. Бастыҥ үлэлээхтэр наҕараадалары туттулар.
Бу күн улуус Аҕа сүбэһиттэрин 5 бастыҥ уопуттара сырдатылыннылар. Көбөкөн нэһилиэгин настаабынньыктарын сэбиэтин бэрэссэдээтэлэ Ирина Федотова “Сайыҥҥы дьиэ кэргэн” лааҕырын тэрийии, Хамаҕатта нэһилиэгиттэн Дария Назарова “Эбээ, эһээ уруоктара”, Хатырык нэһилиэгиттэн аҕа сэбиэтин настаабынньыга Валентин Васильев “Көлүөнэ ситимэ”, “Балыктааһын үөрүйэхтэригэр уһуйуу”, Маймаҕа нэһилиэгиттэн Татьяна Колесова “Маймаҕа кэнчээрилэрэ” кыраайы үөрэтэр лааҕыр үлэтин, “Буойун” түмсүү салайааччыта Павел Оконешников “Буойун” патриотическай лааҕыр үлэтин кэпсээтилэр. Уус Алдан улууһуттан СӨ настаабынньыктарын сэбиэтин чилиэнэ Наталья Говорова, Мэҥэ Хаҥалас улууһуттан СӨ дьахтар түмсүүтүн настаабынньыктарын сэбиэтин чилиэнэ, Нөөрүктээйи нэһилиэгин настаабынньыктарын сэбиэтин салайааччы, “Тыҥ хатыыта” ийэлэр уопсастыбаннай түмсүүлэрин салайааччы Александра Николаева, Майа сэлиэнньэтиттэн настаабынньык сэбиэтин, “Түмэн” уопсастыбаннай холбоһук чилиэнэ, анал байыаннай дьайыы кыттыылаахтарыгар иистэнэр сыах салайааччыта Федора Наумова “Түмэн” үлэтин билиһиннэрэн сырдаттылар.
Майаттан Федора Наумованы сэргэ “Түмэн” уопсастыбаннай холбоһук чилиэнэ Антонина Петрова уонна улууспут “Эркээйи” хаһыатын волонтера Полина Осипова сылдьан элбэҕи көрөн-билэн, кэрэ кэпсээн кэһиилээх кэллилэр. Нам улууһун настаабынньыктарын сэбиэтэ өрөспүүбүлүкэҕэ бастакынан тэриллэн киэҥ хабааннаах элбэх өрүттээх үлэни-хамнаһы ыыппытын бэлиэтээтилэр. Тэрээһин кыттыылаахтара отчуоттуур мунньах түмүгүнэн настаабынньык сэбиэтин салгыы үлэлэтэргэ, улуустарга барытыгар тэрийэргэ, үтүө түмүктээх үлэ уопутун тарҕатарга, 2024 сыл Арассыыйаҕа Дьиэ кэргэн, өрөспүүбүлүкэҕэ Оҕо саас сылларынан салалта, уопсастыбаннас ыытар былааннаах үлэлэрин көрөн бииргэ үлэлэһэргэ уураах ылыннылар.
Марелла Баишева.
