Олунньу 13 күнүгэр үһүс отчуоттуур бөлөх 2-с Наахара нэһилиэгэр олохтоохтору кытта көрүстэ.
Ыйытыыларга, санааны этиигэ кырдьаҕас өртө нолуокка чэпчэтии кимнээххэ көрүллэрин, Амма-Майа суолун аспаалланыыта хаһан салҕанарын, нэһилиэккэ гаас ситимэ хаһан тардылларын, бөһүөлэккэ терапевт бырааһы олохсутан хаһан балыыһаны аһалларын сурастылар, үп-харчы хомунаалынай төлөбүргэ эмиэ тиийбэт курдугун бэлиэтээтилэр.
Чааһынай дьиэ өрөмүөнүгэр хайдах көмө көрүллэрин, сылгы ахсааныгар бэриллэр харчы быйыл салҕаныа, үрэххэ үчүгэй муоста тутуллуутун,
элбэх кыбартыыралаах хаарбах дьиэнэн саҥа кыбартыыраны ылыы салгыы төлөбүрдээх буолуо дуо диэн мунааралларын ыйыттылар.
«Сэбиэскэй кэмҥэ олус элбэх сүөһү-ас баара, тутуу бөҕө буолара. Аспыт-үөлбүт татымсыйда, саха сүөһүтүн элбэтэргэ болҕомтону ууруоҕуҥ. Сопхуостары тэрийиэҕиҥ, ыччат билиитин, кыаҕын туһаныаҕыҥ, билиҥҥи үйэҕэ кыаллар боппуруос», — диэн Иван Павлович санаатын үллэһиннэ. Сир боппуруоһа эмиэ таарылынна, дулҕаны утары охсуһарга үлэни ыытарга эттэ.
Олохтоохтор өрөспүүбүлүкэттэн маннык отчуоту туруораллара суолталаах, наадалаах диэн биир санааҕа кэллилэр.
Тыа сирин ыалларын олорор усулуобуйаларын тупсарыыга болҕомтону ууран, бырайыактары толкуйдуурга, өрдөөҕүтэ тутуллубут дьиэ-уот эргэрбитин саҥардар буоллар төһөлөөх үчүгэй буолуоҕун санаттылар.
Марфа Птицына.
