2-с Наахара нэһилиэгин дьаһалтата олохтоох көҕүлээһини өйүүр бырагыраамаҕа сыллата ситиһиилээхтик кыттар.
Бырагыраама көмөтүнэн нэһилиэкпит уулуссалара сырдатылыннылар, чааһынай ыаллар үксүлэрэ киинтэн ититиигэ холбоннулар, сайыҥҥы уу ситимэ тардылынна, успуорт саалаҕа хапытаалынай өрөмүөн ыытылынна. Бөһүөлэктэн тэйиччи Илиптэ күөлүттэн турбанан иһэр уу ситимэ тардыллан, аны “Вода” массыына бөһүөлэк иһигэр турар цистерналартан таһар буолла. Быйыл бөһүөлэк иһигэр үс суол оҥоһуллан нэһилиэк дьоно-сэргэтэ үөрүүтэ үгүс.
Алтынньы 8 күнүгэр 2025 сылга олохтоох көҕүлээһини өйүүр бырагырааманан нэһилиэнньэ туох-ханнык кыһалҕаны бастакынан туруорсарын быһаарар уопсай мунньах буолла. Мунньаҕы “2-с Наахара нэһилиэгэ” тыа сирин түөлбэтин баһылыга П.П.Никитин уонна көҕүлүүр бөлөх бэрэссэдээтэлэ М.В.Петров салайан ыыттылар. Нэһилиэк дьоно бэйэлэрин этиилэрин киллэрдилэр, санааларын атастастылар. Нэһилиэнньэҕэ ыытыллыбыт ыйытык уонна мунньахха кэлбит дьон куоластааһыннарын түмүгүнэн наахаралар кэлэр сылга бөһүөлэк иһинээҕи оҥоһуллубакка хаалбыт суоллары салгыы оҥорорго быһаардылар.
Олохтоох дьон туруорсууларын өйүүр бырагыраама баар буолуоҕуттан бөһүөлэкпит биллэ тубуста, эдэр ыаллар дьиэ-уот тутталлар. Онон нэһилиэк сайдыытыгар биир сомоҕо буоллахха хотуулаах буоларын олохтоохтор бигэтик өйдөөтүлэр уонна өйөөтүлэр.
Ирина Никанорова. Хочо.