Кулун тутар 13 күнүгэр Майа сэлиэнньэтигэр Жатайдааҕы техникум кэлэктиибэ кэлэн «Идэҕэ туһаайыы – 2025» диэн көрсүһүүнү ыытта.
Тэрээһин Д.Ф.Ходулов аатынан норуот айымньытын дьиэтигэр буолла. Техникум салалтатын, үлэһиттэрин, устудьуоннарын кытта көрсүһүүгэ улуус 10 оскуолатыттан 350-тан тахса 8-10-с кылаастар үөрэнээччилэрэ кыттыыны ыллылар.
Оҕолорго анаан «Сыбаарка технологиялара», «Теплоэнергетикэ», «Медицинскэй массаас», «Суудунаны салайыы», «Повар», «Кондитер», «Медицинскэй сиэстэрэ» идэҕэ үөрэтэр салаалар хайысхаларыгар маастар-кылаастары ыыттылар.
Көрсүһүү түмүгэр техникум кэлэктиибэ эҕэрдэ кэнсиэр бэлэхтээтэ.
Владимир Тихонов, Жатайдааҕы техникум дириэктэрэ:
– «Идэҕэ туһаайыы» тэрээһини иккис сылын ыытабыт. Уус Алдаҥҥа, Аммаҕа, Чурапчыга сылдьыбыппыт уонна бу Мэҥэ Хаҥаласка инники идэҕэ туһаайыы үлэтин ыыта кэллибит. Салгыы Тааттаҕа сырыынан Илин эҥэргэ быйылгы тэрээһиммитин түмүктүүбүт.
«Идэҕэ туһаайыы» тэрээһин бырагырааматын иитинэн оскуолалар, үөрэх управлениетын, төрөппүт кэмитиэтин, үлэлээх буолуу киинин салалталарын кытта техникуммут туһунан «төгүрүк остуол» ыытабыт уонна оскуола оҕололоругар үөрэтэр идэлэрбитигэр маастар-кылаастары тэрийэбит.
Элбэх хайысхалаах идэлэргэ үөрэтэр техникумҥа 1000-тан тахса устудьуон үөрэнэр. Бэйэбит үөрэтэр-бородууксуйаны оҥорон таһаарар комплекспытыгар үөрэнэллэр, үлэлииллэр. Уу тырааныспарын тула идэлэри биэрэбит. Жатайдааҕы судоверфь собуота үлэҕэ киирэринэн онно сөптөөх «Мехатроника», «Робототехника» хайысхаларга эмиэ бэлэмниибит.
Өрөспүүбүлүкэҕэ 11 фирменнэй кылаастаахпыт. 8-9-с кылаас үөрэнээччилэрэ манна анал идэлэргэ үөрэнэннэр, салгыы биһиэхэ көхтөөхтүк үөрэнэ кэлэллэр.
Майаҕа Д.Ф.Ходулов аатынан норуот айымньытын дьиэтин кэлэктиибигэр махталбын тириэрдэбин, дьиэлэрин туран биэрэннэр үлэлииргэ бэрт үчүгэй усулуобуйаны үөскэттилэр.
Бүгүҥҥү күммүт үтүө түмүктэрдээх буолуо диэн олус эрэнэбин! – диэн иһитиннэрдэ.
Иван Лукин.
