Олунньу 2 күнүгэр Майа сэлиэнньэтигэр «Кыталык» уопсастыбаннай кииҥҥэ «Муус устар – 2024» өрөспүүбүлүкэтээҕи бэстибээлгэ биһиги улууспутуттан кыттар ыччаттар түмсэн тэрээһиҥҥэ кыттыы туһунан сүбэлэстилэр.
Көрсүһүүнү улуус социальнай бэлиитикэҕэ управлениетын начаалынньыга Октябрина Кулешова уонна Р.Г.Васильев аатынан улуустааҕы кыраайы үөрэтэр түмэл дириэктэрэ Михаил Масаха иилэн-саҕалаан ыыттылар. Бэстибээлгэ кыттар ыччаттарга бэйэтин үтүө баҕа санаатын, алгыс тылларын улуус Ытык сүбэтин салайааччыта Зиновий Игнатьев тиэртэ.
«Муус устар – 2024» бэстибээл иитинэн «Тайны якутских просторов» видеоролик күрэхтэһиитигэр түмүк түһүмэххэ тахсыбыт кыттааччыбыт Юлиан Владимиров сахалартан бастакы Сэбиэскэй Сойуус Дьоруойа Федор Кузьмич Поповка аналлаах «Доруой ыллыгынан» диэн бырайыгын көрдөрдүлэр.
Улуус баһылыга Дмитрий Тихонов бэстибээл кыттыылаахтарыгар бу эрэ тэрээһиҥҥэ буолбакка, инники олохторугар ситиһилээх, түмсүүлээх буолалларыгар уонна туох баар үчүгэйи баҕарарын этэн туран хас биирдиилэригэр анал пуормалары туттарда.
