Биһиги Павловскай оскуолатыгар “Эдэр кыраайы үөрэтээччи” куруһуокка иккис сылбытын дьарыктанабыт. Салайааччыларбыт Колосова Юлия Егоровна уонна Максимова Наталья Интеровна. Былырыыҥҥыттан наһаа интэриэһинэй “Мусуойга түүн” диэн тэрээһин ыыталлар. Быйылгы үөрэх дьылыгар алтынньы 28 күнүгэр олус интэриэһинэй программалаах тэрээһин буолан ааста. Бастаан быйылгы үлэбит былаанын кытта билсиспиппит.Саҥа куруһуокка киирбит оҕолору чиэстээбиппит, эҕэрдэлээбипптт. Ити кэнниттэн “Бригантина “диэн үлэ уонна сынньалаҥ лааҕырыгар олорбут дьону кытта көрсүһүү буолбута. Кинилэр бары Павловскай оскуолатыгар үөрэммиттэр. Оскуолаҕа үөрэнэ сылдьан сайынын совхозка оҕуруокка үлэлээбиттэр уонна лааҕыырга олорбуттар. Лааҕыр олоҕун туһунан кэпсээтилэр. Надежда Егоровна Романова 3-с кылааһы бүтэриэҕиттэн оҕуруокка үлэлээбит. Бастакы бригантиновец эбит. 1972 сыллаахха лааҕырга бастаан палаткаҕа олорбуттар эбит. Истэргэ олус интэриэһинэй. Яковлева Сахая Дмитриевна лааҕырга олорон өлүү ылан моркуоп, оҕурсу, хаппыыста көрөн хамнас ылан дьоммутугар көмөлөһөрбүт. Ол харчыбытынан дьоммут оскуолаҕа барар таҥаспытын ылаллара. Элбэхтик волейболлуурбут, курэхтэһэрбит диэн кэпсээтэ. Санникова Надежда Афанасьевна 6-с кылаастан оскуоланы бүтэриэр дылы лааҕырга олорбут. Сарсыарда горн тыаһынан уһуктан зарядкалыылларын, линейкалылларын, элбэх интириэһинэй тэрээһиннэр буолалларын, оҕуруокка үлэлииллэригэр бэйэ-бэйэлэригэр көмөлөһөллөрүн туһунан кэпсээтэ. «Бригантина” туһунан өссө ырыа баар эбит. Ол ырыа мелодиятын олохтоох мелодист Михаил Назаров суруйбут. Биһиги ырыаны кытта билистибит, ыллаан да көрдүбүт. Салҕыы нойоһуус үөрэтиэх буоллубут. Дьэ онтон таһырдьа сибиэһэй салҕыҥҥа тахсан станцияларынан нэһилиэкпит историятын билэр сорудахтаах оонньууга кытынныбыт. Хамаандаларга арахсан памятиниктарынан, сквердэринэн баран сорудахтары толорон кэлбиппит. Хараҥа буолан телефоммут фонариктарын туһаммыппыт. Салҕыы музейбытыгар киирэн киэһэ аһылыкпытын , өйүөлэрбитин сиэбиппит, ыалдьыттарбыт аҕалбыт тортарын амсайбыппыт. Онтон мусуой фондатын хайдах чинчийэргэ маастар кылааһы истибиппит. Олус туһалаах , интэриэһинэй тэрээһин буолан ааста. Бары астынан дьиэбитигэр сорудахтаах тарҕаспыппыт.
Юлиана Никулина, В.Н. Оконешников аатынан Павловскай орто оскуолатын 6а кылааһын үөрэнээччитэ.
