Тохсунньу 24 күнүгэр киэһэ улуус баһылыгын 2023 сыллаах отчуота Моорук нэһилиэгэр турда. Манна Ил Түмэн дьокутаата, сир баайыгар уонна айылҕа боппуруостарыгар сис кэмитиэтин бэрэссэдээтэлэ Андрей Находкин, улуус дьокутааттарын сэбиэтин бэрэссэдээтэлэ Иннокентий Андросов, управлениелар, тэрилтэлэр салайааччылара кыттыыны ыллылар. Мунньаҕы нэһилиэк баһылыга Айисен Игнатьев иилээн-саҕалаан ыытта. Улуус баһылыга Дмитрий Иванович ааспыт сылга туох үлэлэр ыытыллан кэлбиттэрин бары хайысхаларынан сиһилии сырдатта.
Бу кэннэ бочуоттаах сынньалаҥҥа олорор үлэ бэтэрээннэрэ Петр Зыков, Роберт Егоров, КФХ салайааччыта Гаврил Скрябин, “Суола” ТХПК бэрэссэдээтэлэ Марианна Зыкова нэһилиэктэрин кыһалҕалаах боппуруостарын ыйыттылар итиэннэ туруорсар этиилэрин оҥордулар, сорохтортон суругунан киирдэ.
Хаптаҕай собуота ханна тиийдэ, Майа собуота тоҕо үлэлээбэт, Табаҕа собуотугар оҥоһуллуохтаах сыр үлэтэ төһөлөөтө, “Земский доктор” бырагырааманан төһө киһи үлэлиирий, Бүтэйдээх суола салгыы оҥоһуллар дуо, сүөһү төбөтүгэр бэриллэр харчы төһө көдьүүстээҕин, суол оҥоһуутугар төһө үп көрүллэрин, оҕону үлэнэн иитиигэ сайыҥҥы өттүгэр үлэ лааҕырдарыгар элбэх үлэ миэстэтин көрөргө, Аллараа Бэстээххэ, Майаҕа саҥа үлэ миэстэлэрин таһаарар наадатын, Табаҕа эҥэр балыыһа наадатын, от ходуһатын ыраастыырга, сайылыкка уот лииньийэтин тардыыга үлэ, суолугар көмө баар буолуо дуо, пиэрмэҕэ гаас киириитин, водокачка үлэлиирэ наадатын, эргэ хотону көтүрэргэ үп көрүллүө дуо, сири оҥоруу үлэтигэр, социальнай хантараак, каадыр боппуруоһа, анал байыаннай дьайыы, о.д.а. сыһыаннаан элбэх ыйытыктар киирдилэр.
Исписэлиис тиийбэтэ нэһилиэккэ толору хааччыллыылаах олорор дьиэ суоҕунан буоларын, тыа сиригэр дьон олороругар толору хааччыллыылаах бөһүөлэги тутуохха наадатын, “Мэҥэ тутуу” тэрилтэ баазатыгар үөрэтэр комбинат тутуохха, идэлэргэ үөрэтиэххэ, тутааччылар династиялара Докторовтар ааттарын өрө тутуохха, улуус граннарын кэпэрэтииптэргэ биэриэххэ, успуорт саала тутарга улуустан көмө наадатын, о.д.а. этиилэр киирдилэр. Салайааччылар киирбит ыйытыктарга толору эппиэттэри биэрдилэр. Улууска үлэ барар, гаас, уот, интэриниэт ситимэ, суол бааллар диэн туран олохтоохтор отчуоту үчүгэйинэн сыаналаатылар.
Ил Түмэн дьокутаата, сир баайыгар, айылҕа боппуруостарыгар сис кэмитиэт бэрэссэдээтэлэ Андрей Находкин уонна улуус дьокутааттарын сэбиэтин бэрэссэдээтэлэ Иннокентий Андросов дьоннорун-сэргэлэрин улуус сайдыытыгар биир сүбэнэн түмсүүлээхтик үлэлииргэ ыҥырдылар. Улуус баһылыга Дмитрий Тихонов анал байыаннай дьайыыга кытта сылдьар биир дойдулаахтарбытыгар нэһилиэк олохтоохторун көмөлөрүгэр махталын биллэрдэ.
Отчуот мунньаҕар барыта 45 киһи кэлбит.
Марелла Баишева.
