Ахсынньы 16 күнүгэр улуус баһылыгын 2024 сылллаах үлэтин отчуота бастаан Моорук нэһилиэгэр турда. Олохтоох култуура киинигэр отчуоту истэ 48 киһи кэллэ.
Улуус баһылыга Дмитрий Тихонов үлэ-хамнас сүрүн көрдөрүүлэрин ааспыт 2 сыллааҕы чахчылары кытары тэҥнэбилгэ олоҕуран билиһиннэрдэ. Отчуоттуур мунньахха оройуон дьокутааттарын сэбиэтин бэрэссэдээтэлэ Иннокентий Андросов, управлениелар, тэрилтэлэр салайааччылара кыттыыны ыллылар.
Салгыы олохтоохтор отчуоттуур бөлөххө ыйытыы биэрэн итиэннэ бэйэлэрин этиилэригэр долгутар кыһылҕаларын туруорустулар. Сүрүннээн кыра нэһилиэк инникитин, тыа хаһаайыстыбатын сайыннарыы суолларын, үүт харчытын үрдэтиини, үүтү тутар, соҕотуопкалыыр «Якутнацпродукт» кэпэрэтиип сылга төһө барыстаахтык үлэлиирин, олохтоох көҕүлээһини өйүүр бырагырааманан үлэҕэ киирбит эбийиэктэр салгыы хайдах үлэлииллэрин хонтуруоллааһын, улууска бырамыысаланнас ханнык тэрилтэлэрэ баар буолуохтарын, олохтоох бэйэни салайыныыга уларытыыны киллэрэр сокуон туһунан туоһуластылар.
Нэһилиэккэ успуорт саалата умайыаҕыттан оҕо-ыччат дьарыктанар, мустар сирэ суох буолбутунан, эбийиэги тутуу боппуруоһун болҕомто кииниттэн түһэрбэти туруорустулар. Гаврил Скрябин үүтү соҕотуопкалыыр тэрилтэ нэдиэлэ аайы үүт сыатын хонтуруоллуура итиэннэ үүтү тутарга чопчу кыраапыктаах буолара наадатын ыйда. Суола үрэх биэрэгэ, эмпэрэ сыл аайы сиҥнэн дьиэлэргэ чугаһаан иһэринэн биэрэги бөҕөргөтөр үлэ наадатын туһунан Екатерина Зыкова эттэ. «Тыа сирэ – саха норуотун сайдар биһигэ» диэн национальнай идиэйэни биһиги улуустан көҕүлээн таһаарыахха, үөһээ өрөспүүбүлүкэ, улуустар салалталарыттан саҕалаан киэҥ хабааннаах кэнсиэпсийэни оҥорон олоххо киллэриигэ үлэлиэххэ, оннук бэлиитикэни ыыттахха эрэ тыа сирэ, нэһилиэктэр инникитин эстибэккэ баар буолуохтара диэн Николай Скрябин санаатын үллэһиннэ. Кини нэһилиэккэ соҕотуопканы биэриэххэ, нэһилиэнньэ сүөһүтүн көрөр кэпэрэтииптэри тэрийиэххэ, үбү тыырар боломуочуйа улууска бэриллэринэн эппиэтинэһи өйдөөн, үбү сөпкө аттаран туруорууга үлэлиэххэ диэтэ.
Марианна Зыкова оскуолаларга идэҕэ туһаайар кылаастары арыйыынан А.М.Апросимов тэрийбит баай литературнай түмэлигэр тирэҕирэн төрөөбүт тылы, төрүт култуураны, үгэһи дириҥэтэн үөрэтэр хайысхалаах кылааһы арыйар кэм кэлбитин эттэ. Үүтү үчүгэйдик ыатахха харчы кэлэр, онон үүт харчытын үрдэтиэххэ диэтэ. Норуокка «балбаах сокуонунан» ааттаммыт дьаһал Саха сирин тыйыс усулуобуйатыгар сөбө суох, эбэтэр балбааҕы мунньарга анал былаһаакканы нэһилиэк аныырын быһаараллара наадатын бэлиэтээтэ. Кини оҕону киин сиринэн ыытан үөрэттэххэ сайдар диэн санаа сөбө суох, оҕо төрөөбүт дойдутугар улааттаҕына ордук сайдар эбит диэн санааҕа кэлбитин үллэһиннэ.
Дьокутааттар оройуоннааҕы сэбиэттэрин бэрэссэдээтэлэ Иннокентий Андросов олохтоох бэйэни салайыныы реформатын «КлиКра сокуонун» сиһилии быһааран биэрдэ.
Биир дойдулаахтарын этиилэрин ситэрэн нэһилиэк баһылыга Айисен Игнатьев түмүктээтэ. Дмитрий Тихонов отчуокка киирбит этиилэр үөрэтиллэн, инники үлэбитигэр сыал-сорук оҥостон үлэлиэхпит диэтэ.
Февронья ОХЛОПКОВА.
