Олунньу 14 күнүгэр үһүс отчуоттуур бөлөх Моорук нэһилиэгэр олохтоохтору кытта көрүстэ.
Кэпсэтиигэ ханна да буоларын курдук сыана ыарааһынын боппуруоһа бастакынан таарылынна. Туһааннаах кэмитиэт бэрэссэдээтэлэ Николай Бочков сыана бэлиитикэтэ туохтан тутулуктааҕын сиһилии быһааран биэрдэ.
Олохтоохтор успуорт саала, оскуола, оҕо саада, кулууп тутуутун, нэһилиэги сип хаабылга хаһан ситэри көһөрөллөрүн, Мооруктан инвест бырайыагынан кэккэ сылларга туох эбийиэк үбүлэниитэ киирэ сылдьарын, тыа сиригэр саҥа тутуллар элбэх кыбартыыралаах дьиэлэр тоҕо быһаччы автономнай гаас ситимигэр холбоммотторун, кытаанах бөҕү уматыы, ирбис сыанатын ыйыталастылар.
Тыл эппиттэртэн тыа хаһаайыстыбатыгар алтынньыттан харчы суох диэн үүт туппаттара моһуоктааҕын, соҕотуопка тэрилтэтин үлэтэ төрдүттэн уларытыллара наадатын бэлиэтээтилэр.
Үүт туттар сыананы үрдэтэргэ, бэтэринээр өҥөтүн чэпчэтэргэ, тыыл бэтэрээннэригэр дьиэ өрөмүөнүгэр бэриллэр көмө харчыны 100 тыһыынча солкуобайга тиэрдэргэ, подстанция кыамтатын улаатыннарарга, тыа сиригэр оскуолалары барыларын агро хайысхалаах оҥорорго, кыра нэһилиэктэргэ сытан эмтэнэр балыыһалары, булт сокуонун сымнатар, тыа хаһаайыстыбатыгар үйэлэрин тухары үлэлээбиттэр олорор усулуобуйаларын тупсарары туруорсаллар. Абалаахха куруорт биисинэһин сайыннарар уолдьаспытын, инвесторынан тимир суол хампаанньатын аныырга эттилэр.
Марфа Птицына
