Уһун унньуктаах томороон кыһыммыт кэннэ, саха омукка күүтүүлээх кэрэ кэммит, от-мас силигилии тыллыыта, күн уһаан, халлаан сылыйан самаан сайын айылҕа уһуктуута, кус-хаас үөрүнэн кэлиитэ буолар. Маннык чаҕылхай ыам ыйын 24 күнүгэр Моорук сэлиэнньэтигэр «Булчут күрэҕэ‒2024» диэн бэрт сэргэх тэрээһин буолан ааста.
Тэрээһини үлэтин саҥа саҕалыыр ыччаппыт, нэһилиэккэ ыччаты уонна дьиэ кэргэни кытары үлэлэһэр эдэр исписэлиис Максим Ксенофонтов уонна Александр Иванов иилээн-саҕалаан ыыттылар.
Бу күнү нэһилиэк аҕам көлүөнэ дьоно, бэтэрээннэрбит уонна эдэр үлэһит ыччаттар түмсэн салама иилии сиэрин — туомун, алгыстаах алаадьынан дойдубут сирин-уотун арчылаан, күндүлээн саҕалаатылар. Ол кэннэ култуура үлэһиттэрэ түмсэн булчут уолаттарбыт Байанай бэрсибит кустарын мииннээн, кэлбит ыалдьыттары күндүлээтилэр.
Күрэхтэһии алта түһүмэхтээх буолла. Олохтоох дьаһалта үлэһиттэрэ дьүүллүүр сүбэлээх түмүгү таһааран, тыҥааһыннаах күрэхтэһиигэ бастакы миэстэни эдэр кэскиллээх булчут Тимур Уваровскай ылары ситистэ. Иккис миэстэни Георгий Лобанов, үсүһү Родион Семенов ыллылар. Олохтоох нэһилиэнньэттэн туруоруллубут сыаналаах бириистэринэн наҕараадаланнылар.
Бу тэрээһиҥҥэ нэһилиэк Байанайдаах булчуттарын оҕолоро, сиэннэрэ бириистэри туруордулар: Сосин Петр Алексеевич оҕолоро Александра Петровна, Егоров Роман Никифорович оҕолоро, Окороков Федосий Васильевич оҕолоро, Пинигин Никифор Васильевич оҕолоро, олохтоох дьаһалта баһылыга Айисен Игнатьев, урукку кэмнэргэ нэһилиэккэ «Байанай» түмсүү салайааччыта Роберт Егоров, Олохтоох хомунаалынай хаһаайыстыба, Моорук бильярднай кулууба, нэһилиэк олохтоох дьаһалтата уонна култуура киинэ, Моорук орто оскуолатын педкэлэктиибэ дьоһун бириистэри туруордулар. Эр дьон, ыччат уолаттар, оҕо аймах кэлэн сэргэхсийэн астынан, үөрэн-көтөн тэрээһинтэн астынан тарҕастылар.
Александра Уваровская.
