Ил Дархан Айсен Николаев көҕүлээһининэн Майа сэлиэнньэтигэр «Мин бастакы хамнаһым» бырайыак үлэтин саҕалаабыта.
Бэс ыйын 1 күнүгэр бырайыакка бастакынан кыттар үөрэнээччилэри СӨ Үлэҕэ уонна социальнай сайдыыга миниистири солбуйааччы Елена Теплякова, улуус баһылыга Дмитрий Тихонов, Майа сэлиэнньэтин баһылыга Алексей Неустроев, нэһилиэнньэ дьарыктаах буолууга киинин салайааччыта Федор Белолюбскай, «Алмазэргиэнбаан» Мэҥэ Хаҥаластааҕы салалтатын салайааччыта Марфа Моисеева эҕэрдэлээбиттэрэ. Бырайыак үлэлиир тэрилтэтигэр «Кэрэли» оҕону эбии үөрэхтээһин киинин дириэктэригэр Александра Охлопковаҕа улуус баһылыга Дмитрий Иванович материальнай-техническэй базаны бөҕөргөтүүгэ анаан 300 тыһыынча солкуобайдаах Туоһу суругу туттарбыта.
Бырайыак партнердара улуус дьаһалтата, улуустааҕы социальнай көмүскэллээх буолуу, үөрэх, социальнай бэлиитикэ, култуура уонна духуобунай сайдыы, тыа хаһаайыстыбатын управлениелара, нэһилиэнньэ дьарыктаах буолуутун киинэ, улуустааҕы биисинэс-инкубатор буолаллар.
Бэй ыйын 3 күнүттэн 14‒18 саастаах бырайыак кыттааччылара сайын устата «Кэрэли» киинингэр «Уран эйгэ» айар түмсүү салаатыгар туойтан араас оҥоһуктары оҥорон, талааннарын арыйыахтара, сайыннарыахтара.
«Мин бастакы хамнаһым» бырайыак салайааччытын, «Кэрэли» педагога Евдокия Захарованы кытта 3 ый бырайыакка 30 оҕо кыттыыны ылыахтаах уонна хас биирдиилэрэ 14 тыһыынча солкуобай хамнастаныахтара, «Алмазэргиэнбаан» анал каартаҕа киириэҕэ.
Бырайыакка бастакынан В.П.Ларионов аатынан Майа орто оскуолатын үөрэнээччилэрэ Тыгын Апросимов, Гена Атласов, Варя Романова уонна Ф.Г.Охлопков аатынан Майа орто оскуолатын үөрэнээччилэрэ Алина Захарова, Вероника Захарова, Күннэй Атласова, Мила Морук, Таня Захарова, Лена Захарова, Сандаара Тобонова кытталлар. Ыһыах күннэригэр оҕолорго элбэх сакаас киирэн үлэлэрин күүстээхтик саҕалаабыттара. Улуус, Майа дьаһалталара уонна култуура управлениета улахан сакаастары биэрбиттэрэ. Билигин буолаары турар педагогтар дьаарбаҥкаларыгар үөрэх управлениетыттан сакаас киирэригэр бэлэм сылдьаллар.
Иван Лукин.
