Олунньу 4 күнүгэр Чыамайыкы нэhилиэгэр Наахара кустовой холбоhук иhинэн Саха Өрөспүүбүлүкэтин норуотун хаһаайыстыбатын үтүөлээх үлэһитэ, бөдөҥ бэлитиичэскэй диэйэтэ, Мэҥэ Хаҥалас улууһун бастакы баһылыга, Хаҥалас уонна Мэҥэ Хаҥалас улуустарын Бочуоттаах олохтооҕо, Санкт-Петербург куоракка Саха Өрөспүүбүлүкэтин бастакы бастайааннай бэрэстэбиитэлинэн үлэлээбит Василий Васильевич Скрябин аатынан «Мин ‒ баһылыкпын» ДЬЫАЛАБЫАЙ ООННЬУУ буолан ааста.
Наахара, Тиэлиги, Чыамайыкы орто оскуолаларыттан 5 уол кытынна. Дьыалабыай оонньуу алта түһүмэхтээх. «Удьуор утума» кыттааччы төрдүн-ууһун билиһиннэрии. Талааннаах, биллэр-көстөр удьуор утумун туhунан уолаттар бэрт интэриэhинэйдик кэпсээтилэр. Иккис түһүмэх ‒ «Дойду салайааччылара мин тус бэйэм көрүүбүнэн». Манна уолаттар билиэт талан ылан дойду салайааччыларын үлэтин-хамнаһын туһунан, кини устуоруйаҕа суолтатын, сабыдыалын ырытан, бэйэлэрин санааларын кинилэр туhунан тугу билэллэрин кэпсээтилэр. Үһүскэ «Өркөн өйгө» блиц-ыйытыыларга хоруйдаатылар. Өйү тургутар аналлаах ыйытыыларга кыттааччы тута төһөнү эппиэттээбитинэн баалы ылар. Төрдүс түһүмэх ‒ «Дьыалабыай оонньуу» (дебат). Билиҥҥи олоххо тыҥаан турар кыһалҕалар тула кэпсэтистилэр. Кыттааччылар аны 10 сылынан улуустарын, нэһилиэктэрин хайдах сайыннарар туhунан былааннарын, баҕа санааларын билиһиннэрдилэр.
Бэһис түһүмэх ‒ «Айыы умсулҕана». Кыттааччылар хоһоон устуруокатын тутатына ситэрэн, салҕаан айан, холонон көрөллөр уонна көрөөччүлэргэ ааҕан иhитиннэрдилэр. Бүтэһик түһүмэх ‒ «Төрөөбүт түөлбэм эйгэтэ ‒ дьоһун олох төрдө». Манна кыттааччыларбыт нэһилиэк табыгастаах эйгэтин тэрийиигэ бырайыак оҥорон көмүскээтилэр.
Үөрэнээччилэр бары бэлэмнэнэн, кыахтарынан кытыннылар. Түмүккэ Кылаан кыайыылаах үрдүк аатын А.А.Пахомов аатынан Тиэлиги орто оскуолатын 8 кылааһын үөрэнээччитэ Вася Захаров сүктэ. Кыттааччылар бары анал аакка тигистилэр. Маннык «Дьыалабыай оонньуу» ыытыллара оҕо түмэр-салайар дьоҕурун, өй-санаа өртүнэн сайыннарар, уол оҕо оруолун үрдэтэр, төрөөбүт дойдуга үтүө сыhыаҥҥа, тапталга иитэр.
Саргылана Романова, Чыамайыкы
