Судьуйа Михаил Сотников аатын улууспутугар эрэ буолбакка, өрөспүүбүлүкэҕэ орто уонна аҕа саастаах көлүөнэ дьон бэркэ билэллэр. Кини ‒ Аҕа дойду Улуу сэриитин кыттыылааҕа, РСФСР үтүөлээх юриһа, уопсастыбаннай диэйэтэл, норуодунай судьуйанан Орджоникидзевскай, билиҥҥинэн Хаҥалас, Алексеевскай, билиҥҥинэн Таатта, Мэҥэ Хаҥалас оройуоннарыгар ситиһиилээхтик үлэлээбит. Быйыл сэтинньи 6 күнүгэр төрөөбүтэ 100 сылын туолла.
Бүгүн, ахсынньы 10 күнүгэр, улууспутугар Михаил Сотников үйэлээх үбүлүөйүгэр аналлаах дэкээдэ Майаҕа оройуонунааҕы суут дьиэтигэр кини аатын үйэтитэр бэлиэ дуоска үөрүүлээх быһыыга-майгыга арыллыынан саҕаланна. Кэрэ-бэлиэ түгэнинэн мустубут дьону улуус баһылыгын социальнай боппуруостарга уонна имиджевэй бэлиитикэҕэ солбуйааччы Альбина Григорьева, «Майа сэлиэнньэтэ» тыа сирин түөлбэтин баһылыга Алексей Неустроев, Мэҥэ Хаҥалас оройуонунааҕы суутун бэрэссэдээтэлин эбээһинэһин толорооччу Афанасий Соловьев эҕэрдэлээн норуот судьуйатын аатын үрдүктүк туппут Михаил Сотников үтүө аата-суола үйэлэргэ өлбөөдүйбэккэ холобур буоларын бэлиэтээтилэр. Кини эппиэттээх да үлэҕэ сырыттар, уопсастыбаннай үлэттэн туора турбакка, оройуоҥҥа бэтэрээннэр сэбиэттэрин бэрэссэдээтэлинэн, ат успуордун федерациятын салайааччытынан өр сылларга үлэлээбитэ. Итини сэргэ үгүс күрэхтэһиилэргэ чөмпүйүөн аатын сүкпүт бэртээхэй саахыматчыт буоларынан дьоҥҥо-сэргэҕэ биллэрэ.
Дэкээдэ саҕаланыытынан В.П.Ларионов аатынан Майа орто оскуолатын үрдүкү кылааһын үөрэнээччилэригэр оройуоннааҕы суут дьиэтигэр экскурсия тэрилиннэ. Оҕолор судьуйа Михаил Сотников олоҕун сырдатар «Ытык киһи олоҕун сэһэнэ» диэн ааттаах И.М.Сосин аатынан улуустааҕы киин бибилэтиэкэ исписэлиистэрэ бэлэмнээбит медиа-уруоктарын көрдүлэр-иһиттилэр уонна судьуйа көмөлөһөөччүлэрин Сардана Горохованы, Федор Кугунуровы кытары көрсөн интэриэһиргиир ыйытыыларыгар толору хоруйдары ыллылар. Үөрэнээччилэр ортолоругар инникитин юрист идэтигэр үөрэниэн баҕалаах оҕолор бааллар эбит.
Улууспутугар норуот судьуйатыгар аналлаах бүгүҥҥүттэн саҕаланан уон хонук иһигэр ыытыллар тэрээһиннэр киэҥ ис хоһоонноохтор. И.Г.Тимофеев аатынан Майа лиссиэйин үөрэнээччилэригэр экскурсия, Ф.Г.Охлопков аатынан Майа орто оскуолатыгар «Сокуоннай саастарын ситэ илик оҕолорго холуобунай эппиэтинэс туһунан» быраап чааһа, Майа оскуолаларын үрдүкү кылаастарын үөрэнээччилэригэр Брейн-ринг, ахсынньы 16 ‒ 20 күннэригэр Р.Г.Васильев аатынан Майатааҕы кыраайы үөрэтэр түмэлгэ Михаил Сотников уопсастыбаннай үлэтин-хамнаһын сырдатар быыстапка тэриллиэҕэ. Ахсынньы 18 күнүгэр Балыктаахха, ахсынньы 20 күнүгэр Майаҕа судьуйа Михаил Сотников үйэлээх үбүлүөйүгэр аналлаах үөрүүлээх тэрээһиннэр ыытыллыахтара.
Алена ДОКТОРОВА.
Иван Лукин хаартыскаҕа түһэриилэрэ.
