Сэтинньи 28 күнүгэр Бүтэйдээх нэһилиэгэр Михаил Егорович Капитонов төрөөбүтэ 90 сылын бэлиэтии, кини аатынан нэһилиэк түмэлигэр өрөмүөн уонна күөх төлөн ситимигэр холбоммутунан үөрүүлээх тэрээһин буолла.
Үөрүүлээх чааһа К.О.Гаврилов аатынан Бүтэйдээх орто оскуолатыттан саҕаланна. Манна М.Е.Капитоновка аналлаах викторина кыайыылаахтарыгар улуус түмэлин дириэктэрэ Михаил Масаха Добун суруктары туттарда.
Кыыһа Валентина Михайловна аҕатын туһунан иһирэх ахтыы оҥордо уонна бииргэ үлэлэспит, алтыспыт доҕотторо, биир дойдулаахтара ахтан-санаан ыллылар. Иккис чааһа Бүтэйдээх нэһилиэстибэтин түмэлигэр ыытылынна. Манна түмэл дириэктэрэ Константин Родионов ыҥырыылаах ыалдьыттары көрсөн Михаил Егорович олоҕун туоһулуур экспонаттарынан сирдэтэн олоҕун сырдатар экскурсияны ыытта. Олорбут дьиэтигэр өйдөбүл дуоскатыгар сибэкки дьөрбөтө уурулунна.
Михаил Егорович аатынан нэһилиэк түмэлигэр өрөмүөн үлэтэ түмүктэммитин үөрүүлээх түгэнигэр аалай кыһыл лиэнтэни быһан, ис өттүн көрөн, үлэлэспит дьоҥҥо махтал тыллара этилиннилэр, эҕэрдэ суруктар туттарылыннылар. Манна улуус баһылыга Дмитрий Тихонов сүҥкэн кылааттааҕын туоһулаатылар уонна түмэллэргэ тус бэйэтин сүрэҕинэн кыһалларын бэлиэтээн махталларын тиэртилэр. Үлэлээбит уолаттарга, чуолаан «Стройкомплекссервиз» генеральнай дириэктэригэр Руслан Трофимовка тус бэйэтин өттүттэн көмө оҥоһуллан, үлэ үрдүк таһымнаахтык ыытыллыбытын, чорботон махтаннылар. Ол кэннэ Михаил Егорович 1971 с. туппут дьиэтигэр остуол тула олорон, өр сыл оскуола дириэктэринэн, нэһилиэк түмэлин хайдах төрүттээбитин, бүтүн өрөспүүбүлүкэ таһымнаах кыраайы үөрэтээччи буолбутун, олоҕун үөрүүлээх кэрчиктэрин ахтан-санаан аастылар.
