Майатааҕы “Мичил” оҕону сайыннарар киин улууска биир бастакынан үлэтин саҕалаабыт кырдьаҕас уһуйаан буолар.
Уһуйаан бастакы тутуллубут дьиэтэ эргэрэн, Сыроватскай аатынан уулуссаҕа урут остолобуойунан үлэлии турбут дьиэни 2012 с. саҥардан, салҕааһыннаан тутан, үлэтин салҕаабыта. Ол салҕааһына саахалланар туруктаах буолан, 2023 с. сааскыттан сабыллан турар. Онно үлэлии турбут ас блога салгыы сбербаан аҥаарыгар баар “Сардаана” уһуйааҥҥа дьукаахтаһан үлэлээбит. Маннык 1 сыл устата оҕолор аһыыр астарын “Сардаана” уһуйаантан “Мичил” үлэһиттэрэ күҥҥэ түөртэ таһан кэлбиттэр. Кыһыҥҥы тымныыга иһиттэрин-хомуостарын тутан, биэдэрэлэрин, миискэлэрин сылаас таҥаһынан тигиллибит мөһөөччүктэргэ уган, салаасканан соһон сылдьыбыттар. Бу сайдыылаах үйэҕэ үлэһиттэр маннык эрэйдэнэллэрин көрөн-билэн, улуус дьаһалтата уонна үөрэх управлениета үбүлээннэр, кылгас кэмҥэ түргэнник тутуллар көһөрүллэ сылдьар модульнай куукуна туттаран бэлэх ууннулар.
Сэтинньи 8 күнүгэр модульнай куукуна үөрүүлээх арыллыытыгар үөрэх управлениетын эбийиэктэрин көрөр-истэр салаа исписэлииһэ Рустам Кривошапкин, тутааччылар – урбаанньыт Афанасий Неустроев, инженер Андрей Никитин кэлбиттэр.
Дьиэлээхтэр ыҥырыылаах ыалдьыттары алаадьынан, саламаатынан айах туттулар.
А.Е.Зыкова аатынан Майатааҕы “Мичил” оҕону сайыннарар киин сэбиэдиссэйэ Виктория Бурнашева кылгас кэм иһигэр модульнай ас астыыр блок тутуллан кэмигэр арыллыбытынан улуус баһылыгар Дмитрий Тихоновка, үөрэх управлениетын начаалынньыгар Гаврил Толстяковка, тутааччыларга махтанан туран, Афанасий Неустроевка, кини хамаандатыгар Андрей Никитиҥҥэ, Владимир Дмитриевкэ, Илья Неустроевка Махтал суруктары туттарда.
Рустам Кривошапкин, Афанасий Неустроев “Асчыттар сылаас илиилэринэн манна бэлэмнээбит иҥэмтиэлээх, араас элбэх минньигэс астарынан оҕолорбут тото-хана аһаан, доруобай буолалларыгар баҕарабыт, инникитин да көмөлөһөргө бэлэммит”, — диэтилэр.
Сэбиэдиссэй Виктория Егоровна ыҥырыылаах ыалдьыттарыныын үөрүүлээх быһыыга-майгыга кыһыл лиэнтэни быстылар. Аныгы ирдэбилгэ эппиэттиир 5х8 кв. миэтэрэ иэннээх толору хааччыллыылаах модульнай куукуна ас астыыр оһохтордоох, душтанар кэбиинэлээх, аһы-үөлү харайар хаһаайыстыбаннай хостоох.
Инникитин саҥа уһуйаан дьиэтэ тутуллар түгэнигэр, модульнай куукуна икки чааска араарыллан тиэллэн, хайа баҕарар нэһилиэккэ баран салгыы үлэлиир кыахтаах.
Урбаанньыт, инженер идэлээх Афанасий Неустроев бэйэтин биригээдэтин кытта тимир каркааһын дойдуларыгар Нөөрүктээйи нэһилиэгэр оҥорон бэлэмнээн аҕалан туруорбуттар. Ис өттүн үлэтин ыйы кыайбат кэминэн ситэрэн-хоторон үлэҕэ киллэрбиттэр. Онон мичиллэр улуус дьаһалтатыгар, үөрэх управлениетыгар махталлара муҥура суох, куукуна үлэһиттэрэ аны тоҥмоттор-хаппаттар диэн үөрүүлэрэ үгүс.
“Мичил” уһуйааҥҥа быйылгы үөрэх дьылыгар 115 оҕо түөрт бөлөҕүнэн сылдьар. Кэлэктиип барыта 34 үлэһиттээх, ол иһиттэн, 15 педагог кырачааннары иитэллэр-үөрэтэллэр.
Дьиэлэриттэн, төрөппүттэриттэн уопсастыбаҕа маҥнай тахсар кырачаан дьону аан бастакынан бэрээдэккэ, култуураҕа, барыга харыстабыллаах буоларга үөрэтэр, киэҥ хайысхалаах билиини биэрэр, араас сатабылларга уһуйар, мэлдьи тот, чэгиэн сылдьалларын хааччыйар кэлэктиипкэ уһуннук үлэлээбит үлэһиттэриттэн кылгастык билиһиннэриэҕи баҕарабын. Кинилэринэн 42 сыл ыстаастаах үлэ бэтэрээнэ, о.и. асчытынан 32-с сылын үлэлиир Федора Саввина уонна кини туйаҕын хатарар баҕалаах, үөрэнээччитинэн ааҕынар, бу уһуйааҥҥа үлэлээбитэ 10-ча сыл, о.и. асчытынан 3-с сылын үлэлиир Тамара Платонова, иитээччинэн 26-с сылын үлэлиир Матрена Сыдыкбекова, 25-с сылын үлэлиир психолог Лена Потапова, 2013 сылтан үлэлиир логопед Евдокия Иванова, 10-ча сыл ыстаастаах гигиенист Валентина Степанова, старшай иитээчи, методист Валерия Захарова буолаллар. Маны сэргэ, завхоз Альбина Ядрихинская, оробуочайдар Константин Алексеев, Гаврил Заболоцкай кыһамньылаахтык үлэлээн кэлэптиип ытыктабылын ылбыттар.
“Чуораанчык” кырачааннар бөлөхтөрүгэр иитээччи Ирина Борисова, көмөлөһөөччүтэ Маргарита Бандерова, “Күнчээн” орто бөлөх иитээччилэрэ Светлана Николаева, Александра Егорова, “Сир симэхтэрэ” улахан бөлөх иитээччилэрэ Матрена Сыдыкбекова, Лена Новгородова, көмөлөһөөччүнэн Евгения Максимова, “Сулусчааннар” бэлэмнэнии бөлөххө иитээччинэн 10-с сылын үлэлиир Матрена Николаева, көмөлөһөөччүтэ Сахалена Готовцева айымньылаахтык үлэлииллэр.
“Мичиллэр” бу күннэргэ уһуйаан оҕолорун икки ардыларыгар илиинэн оҥоһуктарга сыллата 8 хайысханан ыытыллар улуустааҕы “Идэбил” диэн куонкуруска 4 хайысхаҕа: “Ресторанный бизнес”, “Робототехника”, уруһуй уонна суруналыыстыка хайысхаларыгар анал аат кыайыылааҕынан тахсаннар үөрүүлэрэ өссө үрдээтэ.
“Мичил” оҕону сайыннарар киин бары үлэһиттэрин саҥа модульнай куукуналаммыттарынан истиҥник эҕэрдэлээн туран инники үлэлэригэр үрдүктэн үрдүк ситиһиилэри баҕарабыт.
Марелла Баишева.
