Мөҥүрүөн нэһилиэгэр отчуот мунньаҕын нэһилиэк баһылыга Юрий Александров иилээтэ-саҕалаата.
Нэһилиэнньэ көхтөөхтүк кытынна. Үлэ бэтэрээнэ Иннокентий Находкин бөһүөлэк иһинэн ааһар өрөспүүбүлүкэ таһымнаах суолу аспаалланыытын, гаас ситимин тардыы хаһан саҕаланарын, «Хаарбах дьиэ» бырагыраамаҕа чааһынай дьиэ хаһан хабылларын, электроуот төлөбүрэ тоҕо үрдэтиллэ турарын туоһуласта.
Оскуола дириэктэрэ Антонина Находкина оскуола үөрэнээччитин аһылыгын үбүлээһинэ 63-с федеральнай сокуоҥҥа киирбит уларыйыылара хаһан олоххо киирэллэрин, «Ыраас уу» бырагырааматын чэрчитинэн иһэр уу нуормаҕа эппиэттээбэтинэн скважина тутуутугар сүбэни эрэйдэ. Оскуола үлэһитэ Октябрина Брызгалова электроуот лииньийэтэ эргэрэн электроуот элбэхтэ барарын эттэ. Педагогическай үлэ бэтэрээнэ Ангелина Кычкина почта үлэтигэр туох көмө, уларыйыы баарын ыйытта. География учуутала Татьяна Кычкина доруобуйатыгар хааччахтаах кыра уолун санаторийга ыытарга уочарата ыраатан иһэрин эттэ.
Константин Марков тыа хаһаайыстыбатын боппуруостарын чопчуласта. Кини сүөһү ахсааныгар харчыны үүт туттарааччыга биэрэри, субан сүөһүгэ итиэннэ убаһаҕа көмө харчы көрүллэригэр баҕа санаатын тиэртэ, сылгыны күрүөлүүр сокуону сыыһанан ааҕар. Кэлии омук элбэҕин, саа докумуонун эккирэтиһэргэ моһуоктар баалларын, Дьокуускайга арыгы маҕаһыыннарын, аһыы утах тастан киирэрин бохсорго, эрэгийиэннээҕи суолга Матта Эбэни туоруур даамбаҕа тротуар баар буолуон наадатын ыйда. Чааһынай гараас төлөбүрэ тыа сиригэр олорор дьоҥҥо ыараханын, биэнсийэ кээмэйэ кыратын эттэ.
Таксист Рустам Павлов Дьокуускайга Илин эҥэртэн тахсар «50 лет Советской Армии» суол хаһан көнөрүн, оттуур сир тиийбэтин бэлиэтээтэ. Биэнсийэлээх Ульяна Андросова балыыһа кэҥэтиллэрин, нэһилиэккэ аптека наадатын туруорсар. Иитээччи Марианна Ченянова оҕо уһуйааныгар медик ыстаата наадатын уонна модернизация бырайыагынан хапытаалынай өрөмүөн көрүллэрин туруоруста.
Нэһилиэнньэ туруорбут боппуруостарыгар туһааннаах сплайааччылар толору хоруйдары биэрдилэр. Бөлөх салайааччыта Петр Попов олохтоохторго бириэмэлэрин харыстаабака кэлэн отчуоту истибиттэригэр махтанна итиэннэ Үөрэҕирии сайдыытыгар кылаатын иһин Үөрэх министиэристибэтин Бочуотунай грамотатын нуучча тылын учуутала Екатерина Черкашинаҕа туттарда. Отчуоту 66 киһи иһиттэ.
Марелла Баишева.