Кулун тутар 1 күнүгэр Мөҥүрүөн нэһилиэгин дьаһалтатын бирииһигэр өрөспүүбүлүкэтээҕи хапсаҕай күүрээннээх түһүлгэтэ буолан ааста. Өрөспүүбүлүкэ араас улуустарыттан уопсайа 17 хамаанда кэлэн күөн көрүстэ. Нэһилиэкпит баһылыга Юрий Александров: «Тэрээһин үрдүк таһымҥа ааспытыттан астынныбыт. Успуонсардаабыт тэрилтэлэрбэр, күүс-көмө буолбут нэһилиэгим олохтоохторугар махтанабын. Икки абсолютнай бирииһи туруорбуппутуттан биирбит Уус-Алданнаата, биирэ бэйэбитигэр хаалла»,- диэн санаатын үллэстэр.
Тэрээһин саҕаланыытыгар Мэҥэ Хаҥалас улууһун Василий Уваров аатынан олимпийскай резервэ спортивнай оскуолатын дириэктэрин солбуйааччыта Андриан Захаров, оскуола тириэньэрэ Егор Друзьянов, Манчаары аатынан «Модун» спортивнай комплекс тириэньэрэ Вячеслав Данилов эҕэрдэ тылы эттилэр.
Төрүт саха оонньуутун — хапсаҕайы сэҥээрээччилэргэ дьоһун күн буолла. Кыттааччылар бу күн олохтоохтору сүрдээҕин сэргэхситтилэр.
Күүстээх илин-кэлин түсүһүү түмүгүнэн, 27 кг ыйааһыннаахтарга 1 – кы Сайдам Гаврильев (Тумул), 30 кг Өркөн Барашков (Хатылы), 28 кг Арсен Захаров (Хатылы), 29 кг Мичил Драгунов (Хатылы), 35 кг Кирилл Махно (Хара), 42 кг Радомир Баишев (Мэлдьэхси), 55 кг Артем Никитин (Хара), 55 кг үөһэ Боир Хорготханов (Мэлдьэхси), 56 кг дылы Спартак Капитонов (Павловскай), абсолютнай первенство Айылхан Данилов буоллулар. Онтон 2007-2009 сыллаах төрүөх уолаттарга инники Денис Григорьев (Модун), Владислав Тихонов (Таатта), Тимофей Попов (Ленскэй), Мирлан Дьяконов (ЯКШИ), Гарик Кондаков (Уус-Алдан) таҕыстылар.
Уолаттар киэҥ көбүөргэ холонон, ааттаахтардыын алтыһан, күүстээхтэрдиин мускуһан эйгэлэрэ өссө кэҥээбит, сатабыллара үрдээбит буолуохтаах. Өбүгэ номоҕо этэринии, «кыайтарыы кыһыытын билбэккэ, кыайыыга кылыйан тиийбэккин».
Мария Макарова. Матта
