Алтынньы 29 күнүгэр СӨ бөдөҥ судаарыстыбаннай уонна уопсастыбаннай диэйэтэлэ, Ленин аатынан уонна К.К.Байкалов аатынан сопхуостары салайбыт бастыҥ салайааччы, Ленин уордьанын кавалера, РСФСР тыа хаһаайыстыбатын үтүөлээх үлэһитэ, 4 төгүллээн Саха АССР Үрдүкү Сэбиэтин дьокутаатынан, Үрдүкү Сэбиэт Президиумун, ССКП Саха уобаластааҕы уонна ССКП Мэҥэ Хаҥаластааҕы комитеттарын чилиэнинэн хас да төгүллээн быыбарданан үлэлээбит Михаил Павлович Захаров төрөөбүтэ 100 сылын туолла.
Бэлиэ кэми бэлиэтээһин чэрчитинэн Нөөрүктээйигэ кини олорбут дьиэтигэр Мэҥэ дуоска ыйанна.
Тэрээһиҥҥэ оройуон дьаһалтатын аатыттан Станислав Захаров, Нөөрүктээйи нэһилиэгин баһылыга Николай Федоров, Михаил Павлович кийиитэ Анна Захарова, Ленин аатынан сопхуос туруу үлэһитэ Яков Яковлев тыл эттилэр.
Уһулуччулаах салайааччыны аатын ааттыы, санаан ахтан ааһаары, ыччаттарыгар, оҕолоругар үйэтитэн хааллараары модельнай бибилэтиэкэ саалатыгар дьон-сэргэ муһунна. Манна кини туһунан И.П.Игнатьев‒Кинигэ Уйбаан аатынан олохтоох мусуой үлэһиттэрэ Наталья Максимова уонна Юлия Колосова оҥорбут документальнай киинэлэрэ көрдөрүлүннэ, анал истиэндэ аһылынна. Тэрээһини бибилэтиэкэ сэбиэдиссэйэ Нина Колосова салайан ыытта. Уһулуччулаах салайааччы аатын үйэтитэр тэрээһиннэр салгыы салҕаналлар.
