Кулун тутар 6 күнүгэр Мэҥэ Хаҥаласка улууһугар олохтоохтору сылааһынан хааччыйыыга икки саҥа хочуолунай эбилиннэ.
«СӨ ОДьКХ» ГУП инбэстиисийэлиир бырагырааматын чэрчитинэн Дойду уонна Мэҥэ нэһилиэктэригэр чоҕунан оттуллар хочуолунайдар үлэҕэ киллэрилиннилэр. Дьон-сэргэ үөрүүтүн үллэстэ, эҕэрдэ тылларын этэ, анал наҕараадалары туттара «СӨ ОДьКХ» ГУП дириэктэрин бастакы солбуйааччыта, кылаабынай инженерэ Владимир Бондарь, «СӨ ОДьКХ» судаарыстыбаннай унитарнай тэрилтэ холбоһуктаах боропсойууһун бэрэссэдээтэлэ Александр Михайлов, улуус баһылыган тутуу боппуруостарыгар солбуйааччы Василий Филиппов, «Техсервис» ХЭТ бэрэстэбиитилэ Василий Захаров, «СӨ ОдьКХ» ГУТ улуустааҕы салаатын дириэктэрэ Иннокентий Яковлев, нэһилиэктэр баһылыктара сырыттылар. Владимир Владимирович саҥа хочуолунай символическай күлүүһүн “Балыктаах-1” хочуолунай маастарыгар Иван Ноговицыҥҥа үөрүүлээх быһыыга-майгыга туттарда.
Улууска хомунаалынай хаһаайыстыба сайдыытыгар өҥөлөрүн, өр сыллаах үтүө суобастаах үлэлэрин иһин “Оройуон иннигэр үтүөлэрин иһин” бэлиэнэн АДС электромонтера Николай Скрябин, Балыктаахтааҕы учаастак хачыгаардара Ян Скрябин, Сергей Харитонов, АДС суоппара Егор Федоров, АДС электросварщига Максим Федотов, “Улуус хомунаалынай хаһаайыстыбатын сайдыытыгар кылаатын иһин” бэлиэнэн Балыктаахтааҕы учаастак электросварщига Андрей Гоголев, хачыгаар Эдуард Кычкин, учаастак салайааччыта Иван Ноговицын, АДС электросварщига Иван Романов наҕараадаланнылар. “ОДьКХ бэтэрээнэ” ааты Балыктаахтааҕы учаастак хачыгаара Виктор Кычкин ылла. СӨ ОДьКХ Махтал суругунан хачыгаардар Айтал Борисов, Игорь Стручков, Мэҥэ Хаҥаластааҕы филиал Бочуотунай грамотатынан хачыгаардар Василий Цыпандин, Николай Цыпандин бэлиэтэннилэр.
Балыктаахха 4,6 МВт кыамталаах хочуолунайга 32 чааһынай дьиэ сылааһынан хааччыллар. Салгыы нэһилиэк ыалларыгар, саҥа дьиэлэргэ итиитии ситимин холбуурга бэлэмнэр.
Дойдуга үөрүүлээх тэрээһиҥҥэ СӨ ОДьКХ Бочуотунай грамотата Дойду учаастагын хачыгаарыгар Петр Сивцевкэ, Махтал сурук силиэсэр Евгений Кривошапкиҥҥа, хачыгаар Егор Ноговицыҥҥа туттарылынна. Саҥа хочуолунай символическай күлүүһүн Дойду учаастагын маастарын солбуйааччы Егор Ноговицын тутар чиэстэннэ.
Хапчаҕайга 3,45 МВт кыамталаах хочуолунай бөһүөлэк аҥаарын сылааһынан хааччыйан турар. Салгыы үлэ ыытыллан ыаллар бары ититии ситимигэр холбоноругар олохтоохтор эрэнэ күүтэллэр.
Нэһилиэк баһылыктара уонна олохтоохторо саҥа хочуолунайдар тутуллан үлэлэрин саҕалаабыттарыгар бары күүс-көмө буолбут дьоҥҥо улахан махталларын тиэрдэллэр.
Иван Лукин.
