Бүгүн, бэс ыйын 9 күнүгэр, Мэҥэ Хаҥалас улууһун сиригэр-уотугар Норуоттар икки ардыларынааҕы «Азия оҕолоро» VIII успуорт Оонньууларын уотун эстэпиэтэтэ айаннаан кэллэ. Уоту көрсөр үөрүүлээх тэрээһин улууспут административнай киинигэр — Аллараа Бстээххэ ыытылынна. Быйыл саас VIiI Оонньуулар уоттара Өлүөнэ очуостарыгар уматыллыбыта. Онтон ылата өрөспүүбүлүкэбит устун улуустарынан эстэпиэтэнэн бэриллэн айанныыр. Биһиги улууспутугар Оонньуулар уоттарын көрсүү тэрээһинэ үрдүк таһымҥа буолан ааста. Дьон-сэргэ тоҕуоруһа мустан «Азия оҕолорун» уотун факелын тутан ыытыллыбыт эстэпиэтэни көрдүлэр. Бу бэлиэ тэрээһиҥҥэ эстэпиэтэҕэ улуус баһылыга Дмитрий Тихонов, улуустааҕы физическэй култуура уонна успуорт салалтатын начаалынньыга Алексей Попов,, успуорт бэтэрээннэрэ Афанасий Илларионов, Василий Уваровскай, Андриан Захаров, Борис Ильин, Мария Неустроева, «Азия оҕолоро» Оонньууларга араас сылларга Мэҥэ Хаҥаластан Саха сирин чиэһин көмүскээбит Анна Петрова, Алексей Корякин, Алексей Копылов, Артур Жирков, Алексей Стручков, Айтал Дьяконов, киэн туттар спортсменнарбыт Константин Власов, Арина Федорова, оскуола үөрэнээччилэрэ Эрсан Сыроватскай, Эрхан Ларионов, Лилия Дмитриева, Антон Нестеров итиэннэ СӨ физкултуураҕа уонна успуорка миниистирин солбуйааччыта Александр Бугаев, Дьокуускай куорат Тырааныспар уонна суол хаһаайыстыбатын управлениетын начаалынньыга Василий Амбросов, «Азия оҕолоро» Оонньуулар норуоттар икки ардыларынааҕы кэмитиэттэрин генеральнай дириэктэрэ Гаврил Цыпандин кытыннылар. Эстэпиэтэ Аллараа Бэстээх бөһүөлэгин Энергетиктэр кыбартаалларыттан Ленин аатынан уулуссанан уопсайа 4000 миэтэрэ айаннаан Кыайыы болуоссатыгар аҕалылынна. Онно үөрүүлээх миитин буолла. Салгыы Оонньуулар уоттарын эстэпиэтэтэ ыаллыы Амма улууһугар айанныыр.
