Олунньу 23 күнүгэр, Аҕа дойдунун көмүскээччилэр күннэригэр Мэлдьэхси нэһилиэгэр 68-с төгүлүн ыытылллар В.К. Степанов аатын сүгэр култуура уонна успуорт эстэпиэтэтин былааҕа Тиэлигиттэн айаннаан тиийдэ.
Бу күн оһуохай түһүлгэтин оҕо оһуохайдьыт Иван Андросов үҥкүүлээн арыйда. Бу оҕо элбэх маастар кылаастарга сылдьан, үөрэнэрэ наадатын дьүүллүүр сүбэ бэлиэтээн эттэ. Ыччат дьоҥҥо Мария Шарина мэҥэлии оһуохай бары тутулун тутуһан, арыллан туран үҥкүү тылын таһаарда. Улахан дьоҥҥо Андрей Петров оһуохайы эттэ. Дьүүлүүр сүбэ бары оһуохайдьыттарга уһуйуллуу оскуолатын ааһалларыгар, маастарыстыба сайдыытыгар болҕомто ууран үөрэнэллэригэр сүбэлээтэ. Түмүккэ Мария Шарина дипломант аатын ылла. Мэлдьэхси оһуохайа 3,96 баалынан сыаналанна.
Уус-уран оҥоһук быыстапкатыгар 29 киһи, 5 түмсүү 272 үлэни туруордулар. Бу үтүө түөлбэҕэ улууспут холобур оҥостор маанылаах уустара уутуйан үйэ саас үөскүүллэр. Ол курдук, Василий Андросов салайар «Сатабыл» сыахай түмсүүтүн уус – уран композициялара, үлэ бастыҥнарын айхаллыыр саҥа сыахайдара ааспыт үйэ улаҕатыттан өтө көрөн олорор курдуктар. Ону сэргэ, эдэр кэскиллээх ювелир Иннокентий Захаров көмүстэн, алтантан оҥоһуктара көлүөнэ быстыбат ситимнээх үтүө үгэһин өрөгөйүн туоһулууллар. Түмүкккэ лауреаттарынан Василий Андросов, Иннокентий Захаров, «Сатабыл» сыахай түмсүүтэ, Ирина Шарина, Любовь Дмитриевна Степанова, Радион Шарин, «Далбар» түмсүү ааттаннылар. Дипломаннарынан Светлана Иванова, Анатолий Охлопков, Антонина Степанова, Любовь Анатольевна Степанова, Виктор Шарин, Айталина Плотникова, «Иэйии» түмсүү бэлиэтэннилэр. Дьүүллүүр сүбэ салгыы үлэ саха төрүт ииһигэр уонна мас оҥоһуктарга ыытыллара наадатын бэлиэтээн эттэ. Мэлдьэхсилэр быыстапкалара 4,07 баалынан сыаналанна.
Тиэлигилэр уус-уран кэнсиэрдэрин дьон-сэргэ саалаҕа толору мустан олорон көрдүлэр. Кэнсиэр ирдэниллэр 18 нүөмэртэн таҥыллан, табыгастаахтык туруоруллубут. Уотунан-күөһүнэн, тыаһынан киэргэтиитэ табылынна. Хас да көлүөнэ дьон бэйэ бэйэлэрин ситэрсэн биэрэн, кэнсиэри биир тыынынан көрдөрдүлэр. Түмүккэ лауреат үрдүк аата улууспут өрөгөйүн ырыатын солистаабыт Дьулустаан Михайловка, хуор кэлэктиибигэр, Регина Кириллинаҕа, үҥкүү бөлөҕүн «Дьиэрэҥкэй» үҥкүүтүгэр, «Эр хоһуун» эр дьон уус-уран ааҕыы бөлөҕөр, Дмитрий Ефремов солотыгар, чабырҕахсыттар бөлөхтөрүгэр, «Туохтан кыыһырдай? сценкаҕа, «Клоумима» оригинальнай жанрга, Регина Кириллина уонна Лилия Трофимова дуэттарыгар, эр дьон вокальнай ансаамбылыгар иҥэрилиннэ. Дипломаннарынан биһирэннилэр фольклор бөлөҕө, «Эс» сценка, «Синий платочек» үҥкүүгэ уонна ыччат блога наҕараадаланнылар. Тиэлигилэр кэнсиэрдэрэ 4,19 баалынан сыаналанан, кыттыбыт дьон ытыс тыаһынан бэйэ бэйэлэрин айхалластылар!
Дьэ, күннэтэ эстэпиэтэ киирсиитэ сытыырхайар!
Галия Сосина.
