Олунньу 11 күнүнээҕи үлэтин Бырабыыталыстыба бастакы отчуоттуур бөлөҕө Мэлдьэхси нэһилиэгинэн түмүктээтэ. Бөлөх салайааччыта экономика миниистирэ Петр Попов өрөспүүбүлүкэ ситэриилээх былааһын 2024 сыллааҕы үлэтин экраҥҥа көстөр чахчыларга олоҕуран сиһилии сырдатта.
Ол кэннэ отчуоттуур бөлөх кыттыылаахтара, улуус баһылыга Дмитрий Тихонов олохтоохтор ыйытыыларыгар, этиилэригэр сиһилии хоруйдары, быһаарыылары биэрдилэр.
Отчуокка Ил Түмэн дьокутаата Захар Никитин кыттыыны ылла, норуот дьокутаатын быһыытынан үлэтин сырдатта, олохтоохтор этиилэрин, санааларын истэн бииргэ үлэлэһэр баҕалааҕын эттэ.
Суола олохтоохторо хас да сыл туруорсан кэлбит боппуруостарын – оскуола өрөмүөнүн, суолу оҥоруу, бөһүөлэк иһигэр салгыы гаас ситимин тардыы, скважинаны тутуу, тыа хаһаайыстыбатын бородууксуйатын оҥорон таһаарааччылары өйөбүл туһунан, ОДьХХ үлэһитин ахсаана аҕыйааһынын, уот ситимин сиип-хаабылга көһөрүү, күһүн-саас эбэни туорааһыҥҥа Илин эҥээр олохтоохторугар өйөбүл көрүллүүтүн, уматык сыанатын хонтуруоллуур кыаллар дуо диэн, о.д.а.ыйытыктары биэрдилэр.
Массыына ыытарга үөрэммит дьонтон Майаҕа эксээмэн тутан, ыытар быраабы биэрии харгыстанан турарын туһунан Ольга Сокольникова эттэ. Кини тыа хаһаайыстыбатыгар үлэлиир эдэрчи дьону өйөөһүҥҥэ туох эмэ миэрэ, анал бэлиитикэ наадатын ыйда.
Үлэ бэтэрээнэ, 85 саастаах ытык кырдьаҕас Александра Сивцева урукку өттүгэр тыа хаһаайыстыбатыгар ыччаты кытта үлэлээбитин, билигин ыччат тыа сиригэр кэлбэтин эттэ. Нэһилиэктэргэ ыччакка уонна кини курдук аҕам саастаахтарга анаан толору хааччыллыылаах дьиэлэри тутар наадатын ыйда.
1907 сыллаахха аһыллыбыт нэһилиэк оскуолата 1994 сыллаахха саҥа дьиэ тутуллан киириэҕиттэн биирдэ да өрөмүөннэммэккэ турарын, интэринээккэ дуобакка, мас тардыһыытыгар Арассыыйаҕа тиийэ улуус аатын ааттатар оҕолор олороллорун, хапытаалынай өрөмүөн ыытылларыгар үлэ барарын истэн үөрбүттэрин Надежда Андросова эттэ. Кини анал байыаннай дьайыы бара турар уустук кэмигэр бары сомоҕолоһон, түмсүүлээх буолуохха, туох кыалларынан көмөлөһүөххэ диэн санаатын тиэртэ.
Светлана Иванова былааска баар дьон сүрүн болҕомтону, уопсай бэлиитикэни куораттар эрэ буолбакка, тыа сирин сайдыытыгар туһаайар кэмҥит кэллэ диэтэ. Үксүн отчуокка, холобур, оҕо төрөөһүнэ үрдээтэ диэн, саба быраҕан этэҕит – тыа сиригэр оҕо төрөөһүнэ үрдээбэт, сыллата түһэн иһэр диэн ыйда. Ыччат тыа сиригэр кэлэрин инниттэн манна суолу-ииһи, дьиэни-уоту тутууга үлэ барыахтааҕын эттэ.
Мэлдьэхси нэһилиэгэр бырабыыталыстыба отчуотугар 51 киһи кыттыыны ылла. Олохтоохтор туруорсууларын түмэн, нэһилиэк сайдыытыгар ааспыт сылга барбыт үлэни сырдатан баһылык Валерий Никифоров эттэ. Кини ытыктыыр биир дойдулаахтара Владимир Птицын 75 сааһын бэлиэтээһин чэрчитинэн кини аатынан уулуссаны өрөмүөннээһиҥҥэ өйөбүлү эрэйэллэрин, нэһилиэк сыл түмүгүнэн бэйэтин бөлөҕөр иккис көрдөрүүлэммитин иһитиннэрдэ.
Отчуоттуур бөлөх салайааччыта, улуус кураатара Петр Попов олохтоохтор сөптөөх боппуруостары туруорсалларын, тыа сирин кыһалҕаларын билэрин, өйдүүрүн, ону быһаарыыга күннэтэ үлэ барарын эттэ. Анал байыаннай дьайыы, тас дойдулар сааҥсыйалара дойду, ол иһигэр өрөспүүбүлүкэ сайдыытыгар, үбүлээһинигэр дьайыытын өйдүүллэригэр, нэһилиэк, улуус дьаһалталарын тула түмсүүлээх буолалларыгар ыҥырда. Отчуоттуур мунньах кэнниттэн нэһилиэк сүрүн кыһалҕатын – оскуола туругун көрө барарын туһунан иһитиннэрдэ.
Февронья ОХЛОПКОВА.
