Олунньу 25 күнүгэр, үгэс буолбут В.К. Степанов аатын сүгэр култуура уонна спорт 68-с эстафетатын былааҕа Мэлдьэхситтэн ыаллыы Бэдьимэҕэ тиксэрилиннэ.
Тыҥааһыннаах күн буоларын курдук оһуохай түһүлгэтиттэн саҕаланна, барыта 30 киһи кыттыста. Оҕолорго Айсен Игнатьев, эдэр ыччаттарга Елена Дмитриева, аҕа көлүөнэҕэ Валентина Попова оһуохай тылын таһаардылар. Дьүүлүүр сүбэ инникитин оһуохайы таһаарааччылар туһааннаах семинардары, маастар кылаастары көтүппэккэ кыттан, эдэр дьон сайдан улахан түһүлгэлэргэ тиийэрдии үүнүөхтэригэр баҕа санаатын тириэртэ. Түмүккэ Елена Дмитриева дипломант, Валентина Попова лауреат аатын ыланнар, бэдьимэлэр оһуохайдара 4,02 баалынан сыаналанна.
Уус-уран оҥоһук быыстапкатыгар 77 кыттааччы, 6 түмсүү хабыллан 371 оҥоһук туруоруллубут. Ирдэнэр хайысхалары барытын хабан быыстапканы туруорууга, инникитин экпозиционнай тутула тупсуутугар, быыстапка композициялаах буолуутугар болҕомто уурулларыгар баҕа санаабытын эттибит. Ордук бу күн, олохтоох уран тарбахтаах ытык киһибит Мария Ефремовна Сергучева уонна кини утумнуур ыччат дьонун туоһунан сахалыы иһит – хомуос талба көстүүтүн астына көрдүбүт. Кэлэр сылларга болҕомтону сахалыы олоҕурбут ньыманан төрүт иис сайдыытыгар уонна мастан төрүт оҥоһуктары оҥорууга сүрүн болҕомто ууруллара тоҕоостооҕун бэлиэтээтибит. Түмүккэ уус-уран быыстапка дипломаннарын аатын Илья Михайлов, Мария Неустроева, Николай Андреев, Анастасия Ефимова, Мичил Андреев, Роман Иванов, Ия Секова, «Добун» эр дьон түмсүүтэ, «Туой тойуга» түмсүү, «Сыахай» түмсүү ыллылар. Лауреаттарынан Алексей Мопполов, Мария Сергучева, Суор уола Сарыал Баишев, Октябрина Спиридонова, Рустам Юмшанов, Виктория Свинобоева, «Дьүөгэ» түмсүү, Н.Д. Неустроев аатынан орто оскуола «Иэйии» түмсүүтэ уонна «Дьөһөгөй бэлэҕэ» түмсүү ааттаннылар. Бэдьимэлэр быыстапкалара 4,08 баалынан сыаналанна.
Мэлдьэхси нэһилиэгин уус-уран самодетяельноһын кэнсиэригэр 60 киһи кыттыыны ылла, ирдэнэр бары 18 нүөмэр туруоруллубуттар. Мэлдьэхсилэр ордук үҥкүүлэргэ хас да көлүөнэ дьону хабан кытыннарбыттара сонуннук көһүннэ. Ол эрэн, ыйыллыбыт үҥкүүлэр тиэмпэлэрэ арыый бытааннык толоруллубутун идэлээх үлэһиттэр бэлиэтии көрдүлэр. Саха көрүн-күлүүтүн классиката буолбут туруорууларга олоҕурбут, эдэр көлүөнэ дьон толорбут сценкаларын, ураты туруоруулаах оригинальнай жанрга нүөмэри көрөөччү ытыс тыаһынан, уҕараабат күлүүнэн көрүстэ. Чабырҕахха олорон ааспыт биир дойдулаахтара, фольклору тарҕатааччы Лэгэнтээс Колесов репертуарыттан Любовь Платонова туруорбут чабырҕаҕа биһирэннэ. Биллэрин курдук, уус-уран самодеятельность бары көрүҥүттэн дьоҥҥо-сэргэҕэ саамай чугастара, элбэх кыттааччыны бэйэтин тула түмэр жанр – ырыа буолар. Ол көрүҥҥэ бу күн чаҕылхай нүөмэри дьүүллүүр сүбэ бэлиэтии көрбөтө. Мэлдьэхсилэргэ кэлэр сылларга ырыалары бэлэмнээһиҥҥэ улахан болҕомто ууруллан, идэлээх специалистары үлэлэтэн нэһилиэккэ самодеятельнай ансаамбыллар уонна хор сайдыытыгар былааннаах үлэ күүскэ барыан наадатын дьүүллүүр сүбэ бэлиэтээн эттэ. Кэнсиэр дипломаннарын аата ыччат блогун туруоруутугар, «Үөрэнээччи» сценкаҕа, ыччаттар узбекскай үҥкүүлэригэр, эр дьон дэйбиирдээх үҥкүүтүгэр туттарылынна. Лауреаттарынан чабырҕахсыттар бөлөхтөрө, үҥкүү бөлөҕүн толоруутугар «Дьиэрэҥкэй» үҥкүү, «Дьүөгэлиилэр» сценка, «Нооһой сиэттэрэ» уус – уран ааҕыы бөлөҕө уонна оригинальнай жанр буоллулар. Мэлдьэхси нэһилиэгин уус—уран самодеятельноһын кэнсиэрэ 3,99 баалынан сыаналанна.
Ити курдук, иккис бөлөххө бастыҥнар ааттарын иһин киирсии сытыырхайар, дьон – сэргэ интириэһэ күүһүрэр.
Галия Сосина.
