Сэтинньи 29 күнүгэр Мэлдьэхси нэһилиэгин дьоно-сэргэтэ өр күүппүт баҕа санаата туолан олохтоохтор көҕүлээһиннэрин өйүүр бырагырааманан Норуот айымньытын элбэх хайысхалаах киинэ саҥалыы өрөмүөннэнэн аанын тэлэччи арыйда.
Үөрүүлээх чааһы улуустааҕы култуура управлениетын салайааччыта Анна Исакова эҕэрдэ тылынан саҕалаата. Нэһилиэк баһылыга Валерий Никифоров суолталаах күнүнэн итиитик- истиҥник эҕэрдэлээн туран, олохтоох дьаһалта, кулууп, А.В.Чугунов аатын сүгэр оскуола, уһуйаан, интэринээт, ОДьКХ кэлэктииптэрэ биирдии күннээх хамнастарын, аахсыйаларга кыттыбыт нэһилиэнньэ, биир дойдулаахтара харчынан көмө оҥорбуттарын кэпсээтэ. Субуотунньуктарга бэйэлэрин техникаларынан көмөлөһөн үлэлээбит тырахтарыыстар, олохтоох нэһилиэнньэ, оскуола үөрэнээччилэрэ улууспут успуордун, култууратын управлениетын, киин бибилэтиэкэтин, «Парус» комплекс, урукку Дьоруой Попов аатынан сопхуос дьаһалталарын, кулууптарын үлэһиттэрэ турунан туран үлэлээбиттэрин бэлиэтээтэ. Сүрүн үлэни эдэркээн Василий Афанасьев салалтатынан олохтоох ыччаттар Василий Шарин, Руслан Сокольников, Афанасий Степанов, Айтал Степанов, Иван Брызгалов, Вячеслав Никифоров, Борис Плотников, Тимофей Сыромятников, Валентин Сокольников оҥорон тэтимнээхтик түмүктээбиттэрин, Иван Федоров тэрилтэтэ киин түгэх буорун тымнытан бөҕөргөтөр конструкциялары туруорбутун этэн туран Эҕэрдэ суруктары туттартаата.
Норуот айымньытын киинин өрөмүөнүгэр күүс-көмө буолбут оройуон салалтатыгар (Дмитрий Тихонов), биир дойдулаахтарыгар, Владимир Птицыҥҥа, Николай Старостиҥҥа, Гаврил Слободчиковка, Виталий Пестряковка, Варвара Степанова‒Арчыынаҕа, Октябрина Жуковаҕа, Мэҥэ Хаҥаластааҕы ОДьКХ салайааччытыгар Иннокентий Яковлевка, киин бибилэтиэкэ салайааччытыгар Марианна Никанороваҕа, Аллараа Бэстээх бөһүөлэгин баһылыгар Юрий Колмаковка, Нөөрүктээйи нэһилиэгин баһылыгар Николай Федоровка, Хорообут нэһилиэгин баһылыгар Гаврил Бродниковка, 1-кы Баатара нэһилиэгин баһылыгар Петр Андросовка, Дьаҥхаады нэһилиэгин баһылыгар Василий Стручковка, Баатара нэһилиэгин баһылыгар Дмитрий Акимовка, успуонсардаабыт Люция Яковлеваҕа, Роберт Неустроевка, Наталья Герасимоваҕа, Эдьигээннээҕи «Дюмия» этнокиин салайааччытыгар Аполлон Степановка, Агафья Семеновна, Иннокентий Андреевич Варламовтар оҕолоругар, сиэннэригэр, Матрена Ивановна, Гаврил Павлович Игнатьевтар оҕолоругар, сиэннэригэр, Александра Алексеевна Колосова, Федор Григорьевич Птицын оҕолоругар, сиэннэригэр, олохтоох нэһилиэнньэҕэ махтал тыллара этилиннилэр.
Үөрүүлээх тэрээһин Виталий Очиров салайааччылаах «Айыллаан аартыктара» бөлөх кэнсиэринэн түмүктэннэ.
Норуоппут айымньытын киинэ тыа сирин дьонун түмэр, сомоҕолуур кыахтанна. Онон, нэһилиэкпит олохтоохторун мантан ыла кулууппут күлүмүрдүү сырдык уоттара ыҥыра, угуйа турдуннар.
Аграфена Васильева, Мэлдьэхси нэһилиэгин бэтэрээннэрин сэбиэтин бэрэссэдээтэлэ.
