«Доруобуйа» национальнай бырайыак
Балаҕан ыйын 12 күнүгэр Мэлдьэхси нэһилиэгэр бүгүн үөрүүлээх күн үүннэ.
Нэһилиэккэ «Доруобуйа» национальнай бырайыагынан аныгылыы биэлсэр-акушер пууна тутулунна. Үөрүүлээх аһыллыы түгэнигэр олохтоохтор үөрүүнэн тоҕуоруһа муһунна.
Сахалыы сиэринэн аал уот оттон Зиновий Игнатьев алгыстаата. Аалай лиэнтэни сэбиэдиссэй Ульяна Билюкина, доруобуйа харыстабылын министирин солбуйааччы Надежда Федорова, улуус кылаабынай бырааһа Алексей Павлов быстылар.
Тэрээһиҥҥэ СӨ Доруобуйа харыстабылын миниистирин солбуйааччы Надежда Федорова кыттыыны ылан эҕэрдэлээтэ. Улуус дьокутааттарын Сэбиэтин бэрэссэдээтэлэ Иннокентий Андросов балыыһа сэбиэдиссэйэ Ульяна Билюкинаҕа, медсиэстэрэ Ирина Охлопковаҕа, санитарка Зоя Охлопковаҕа улуус сайдыытыгар кылааттарын иһин анал бэлиэлэринэн наҕараадалаата. Мэлдьэхси нэһилиэгин баһылыга Валерий Никифоров тутуу үлэһиттэригэр Махтал суругу, балыыһа үлэһиттэригэр бэлэхтэри, 10 тыһыынча солкуобайдаах сэртипикээти, улуус балыыһатын кылаабынай бырааһа Алексей Павлов үлэһиттэрин эҕэрдэлээн туран грамоталары, сэмэй бэлэхтэри туттардылар. Балыыһаҕа элбэх функциялаах принтер бэлэхтэннэ. Тэрээһини А.В.Чугунов аатынан орто оскуола үлэһиттэрэ үҥкүүнэн киэргэттилэр.
Надежда Андросова.
Мэлдьэхси.
