Ахсынньы 5 күнүгэр норуоттар икки ардыларынааҕы Волонтёр күнүн иитинэн Мэлдьэхси нэһилиэгэр саҥа тыыннаммыт бибилэтиэкэ арылынна.
Бу күн манна «QUIZ» өй-санаа оонньуута ыытылынна. Киэһэтин нэһилиэк олохтоохторугар уонна ыалдьыттарыгар «Мэҥэ Хит» айар бырайыак «Тапталтан тыллыбыт ырыалар» диэн истиҥ-иһирэх кэнсиэрин дьоро түһүлгэ буолла.
«Бүгүн Мэлдьэхси нэһилиэгэр үтүө күн тосхойдо – И.М.Сосин аатынан улуустааҕы киин бибилэтиэкэ филиалын хапытаалынай өрөмүөн кэнниттэн саҥардыллан киирбит уораҕайа арыллынна, – диэн улуустааҕы култуура уонна духуобунай сайдыы управлениетын информационнай-методическай киинин салайааччыта Галия Сосина билиһиннэрдэ. – Биһиги махтанабыт өрөмүөн үлэтигэр күүс-көмө буолбут дьоммутугар: «Мэҥэ-тутуу» ПК, чуолаан, прорабыгар Кирилл Тастыгинҥа, Мэлдьэхси нэһилиэгин дьокутаатыгар Роберт Неустроевка, «Култуура волонтерда» хамсааһыны өйүүр биир идэлээхтэрбитигэр, И.М.Сосин аатынан улуустааҕы киин бибилэтиэкэ дириэктэригэр Марианна Никанороваҕа, улуустааҕы култуура уонна духуобунай сайдыы управлениетын салайааччытыгар Анна Исаковаҕа. Маннык норуот көҕүлээһининэн, саҥа сонун, сэргэх оҕо-ыччат сайдар, түмсэр кииннэрэ элбии турдуннар диэн баҕа санаабытын тириэрдэбит”.
Өй-санаа оонньуутугар 2 нэһилиэктэн уопсайа 6 хамаанда кыттыыны ылла. Оонньууну И.М.Сосин аатынан улуустааҕы киин бибилэтиэкэ ааҕааччыны кытта үлэлиир салаатын үлэһиттэрэ тэрийэн ыыттылар. “Тэрээһиҥҥэ Мэлдьэхси уонна Бэдьимэ нэһилиэктэриттэн учууталлар, эдэр ычаттар, далбар хотуттар көхтөөх кыттыыны ыллылар, – диэн киин бибилэтиэкэ ааҕааччыны кытары үлэлиир салаатын сэбиэдиссэйэ Аграфена Зыкова билиһиннэрдэ. – Билиини тургутар 3 түмүмэххэ биһиги Саха сирин туһунан араас хайысхалаах ыйытыылары, хоруйдары бэлэмнээбиппит. Тыҥааһыннаах оонньуу түмүгүнэн «Үргэл» култуура үлэһиттэрин хамаандата (Бэдьимэ) кыайыылы ылла. Иккис миэстэҕэ «Дьулуур» ыччат түмсүүтэ (Бэдьимэ), үһүс миэстэҕэ «МСОШ» оскуола үлэһиттэрэ (Мэлдьэхси) таҕыстылар”.
Тэрээһин генеральнай успуонсара «Айар» кинигэ кыһата хас биирдии кыттааччыга кинигэ бэлэх уунна.
