Олунньу 1 күнүгэр Мэлдьэхси нэһилиэгэр Саха Өрөспүүбүлүкэтин норуотун хаһаайыстыбатын үтүөлээх үлэһитэ, «Гражданскай килбиэн» бэлиэ хаһаайына, Саха Өрөспүүбүлүкэтин Бочуоттаах кырдьаҕаһа, Мэҥэ Хаҥалас уонна Мэлдьэхси нэһилиэгин Бочуоттаах олохтооҕо, Мэҥэ Хаҥалас улууһун «Сыана бэтэрээнэ» бэлиэ, «Сэрии оҕолоро» мэтээл хаһаайына Михайлов-Сыромятников Иннокентий Маркович аатын, үлэтин-хамнаһын, мөссүөнүн үйэтитэр бүүс арыллыыта буолла.
Бүүһү арыйыыга чиэс оройуон дьокутааттарын сэбиэтин бэрэссэдээтэлигэр Иннокентий Андросовка, Мэлдьэхси нэһилиэгин тыа сирин түөлбэтин баһылыгар Валерий Никифоровка, бүүһү оҥорбут скульпторга Нюргустана Филипповаҕа уонна Иннокентий Маркович төрөппүт кыыһыгар Октябрина Жуковаҕа бэрилиннэ.
Бэлиэ күҥҥэ эҕэрдэ тылы Ил Түмэн Судаарыстыбаннай мунньаҕын дьокутаата, Мэлдьэхси орто оскуолатыгар дириэктэринэн үлэлээн ааспыт Андрей Находкин, оройуон дьокутааттарын сэбиэтин бэрэссэдээтэлэ Иннокентий Андросов, Мэлдьэхси нэһилиэгэ тыа сирин түөлбэтин баһылыга Валерий Никифоров, өр сылга бииргэ алтыһан үлэлээбит Мэҥэ-Хаҥалас улууһун, Баатара нэһилиэгин бочуоттаах олохтооҕо Иван Ходулов уонна Иннокентий Маркович уола Иннокентий Иннокентьевич эттилэр.
Бүүһү чочуйан оҥорууга үлэлээбит скульптордарга Нюргустана Филипповаҕа, Николай Филипповка уонна Дмитрий Петровка улуус уонна нэһилиэк салалтатын Махтал суруктара туттарылынна. А.В.Чугунов аатын сүгэр Мэлдьэхси орто оскуолатын үрдүкү кылааһын үөрэнээччилэрэ, учууталлара, нэһилиэк олохтоохторо, ыаллыы 1-кы Баатара нэһилиэгин баһылыга Петр Андросов, Баатара нэһилиэгин баһылыга Дмитрий Акимов Иннокентий Марковичтыын бииргэ алтыһан үлэлээбит дьонун-сэргэтин аҕалан кыттыыны ыллылар. Михайлов-Сыромятников Иннокентий Маркович кэргэнин Анастасия Самсоновна Романова, оҕолорун, аймахтарын махтал тылларынан өйдөбүнньүк түгэн түмүктэннэ.
Мария Григорьева