Кэрэни түстүүр аналлаах сааскы күн күлүмүн курдук үтүөкэн дьүһүннээх, толомон маҥан күн туналҕанын курдук толбонноох ньуурдаах, киирэн эрэр күн килбиэнин курдук килбиэннээх иэдэстээх Егор Дмитриевич Кычкин аатынан Матта орто оскуолатын кэрэ кыргыттара кыттыылаах «Кэрэчээнэ Куо – 2025» уонна “Кэрэ Кыталык Куо – 2025” диэн сааскылыы сайаҕас киэһэҕэ сүргэни көтөҕөн, сүрэхтэри сылаанньыта, кулун тутар 7 күнүгэр Я.П.Кычкин аатынан сынньалаҥ киин киэҥ уораҕайыгар буолан ааста.
Быйылгы үөрэх дьылыгар биһиги оскуолабыт иһинэн «Кыыс Куо» бырайыагы 10 кылаас үөрэнээччитэ, Влада Павлова салайан үлэлэтэ сылдьар. «Кыыс Куо” түмсүүтүгэр оскуола кэрэчээн кыргыттара бары хабыллан сылдьаллар. Хас ый аайы араас хабааннаах тэрээһиннэри тэрийэллэр, ол чэрчитинэн биир саамай улахан бырайыага «Кэрэчээнэ Куо»- алын кылаастар кыргыттарыгар, “Кэрэ Кыталык Куо” — улахан кылаас кыргыттарыгар аналлаах куонкуруһа буолан ааста. Влада бэйэтэ салайаччы, көҕүлээччи эрэ буолбакка бэйэтин эмиэ тургутан көрдө, кыргыттарын кытта тэбис – тэҥҥэ кытынна.
Кыыс уонна Кэрэ диэн тыллар бэйэ-бэйэлэрин ситэрсэн биэрэр курдук бэркэ да дьүөрэлэhэллэр. Кыыс сырдык мичээрэ — кэрэ, кынтайа хаамара — кэрэ, дьиэрэтэ ыллыыра — кэрэ,үҥкүүлээн дайара — кэрэ!
Кэрэни өйдөөн көрөр сытыы харахтаах, үтүө сүрэхтээх, кырдьыгы этэртэн чаҕыйбат дьонноох, дьүүллүүр сүбэҕэ олордулар: Андросова Елена Львовна- истиҥ ийэ,эбээ, нэһилиэк бастыҥ көхтөөх кэрэ аҥара, нэһилиэк кыраайын үөрэтээччитэ. Находкин Тимофей –оскуола 10 кылааһын үөрэнээччитэ, оскуола лидера. Кычкина Мария Ивановна — сынньалаҥ киин директора, Скрябин Дмитрий Васильевич- дьаһалта үлэһитэ. Кычкина татьяна Николаевна- өр сылларга дьахтар сэбиэтинэ талыллан үлэлээбитэ, күн күбэй ийэ, эйэҕэс эбээ, муниципальнай сулууспа бэтэрээнэ.
Куонкуруспут алта түһүмэхтэн турда, ол курдук:
«Удьуорбун утумнаан, өбүгэбин кэриэстээн!» -бэйэни билиһиннэрии түһүмэҕэр кыттааччылар бэйэ көрүүтүгэр, сатабылыгар олоҕуран бэйэлэрин билиһиннэрдилэр. «Хамсаныахха, чэгиэн- чэбдик буолуохха!» — түһүмэххэ кыттааччылар бука бары биир спортивнай үнкүүнү көрдөрүлэр. «Кыыс оҕо – кэскил кэрэһитэ» — тургутук ыйытыыларга хоруйдаатылар. «Талба талан түһүлгэтэ»- талааннарын көрдөрдүлэр. Саамай күүтүүлээх уонна долгутуулаах түһүмэхпит «Кындыа кыталык кыргыттар» — дьиэҕэ сорудах бэриллибитигэр кыргыттар дьиэлэригэр кыталык уобараһын оҥостон кэлэн хааман көрдөрдүлэр. Көрүөхтэн кэрэ кыталык уобараһын кыттааччылар бэйэлэрэ илиинэн оҥорон, тигэн дьүһүйбүттэрин, көрөөччүлэр астына, үөрэ сэргээтилэр. Уонна куонкурспутун түмүктээтэ «Кыыс оҕо кылааннааҕа» түһүмэх, киэһээҥҥи былааччыйалаах сэгэлдьиһэ хаамтылар.
Күрэх түмүгүнэн: алын кылаас кыргыттарыгар «Кэрэчээнэ Куо — 2025» — кыайыылааҕынан Милена Аталларова – 2 кылаас үөрэнээччитэ буолла. Улахан кылаас кыргыттарыгар “ Кэрэ Кыталык Куо — 2025”- кыайыылааҕынан Сайнара Андросова — 7 кылаас үөрэнээччитэ буолла.
Ону сэргэ анал ааттар олохтоннулар:
«Көрөөччү биһирэбилэ» — кыргыттар хаартыскаларынан оскуола ВК страницатыгар куолаастааһын ыытыллыбыта ол түмүгүнэн икки кыайыылаахха: Милена Аталлароваҕа, Ильина Емелиянаҕа Я.П. Кычкин аатынан культура сынньалаҥ киинэ олохтообут бэлэҕэ туттарыллынна.
«Мичийээнэ Куо” – анал аат хаһаайкатынан Сергеева Амелия 1 кылаас үөрэнээччитэ буолла.
“Кэскилээнэ Куо” – анал аат хаһаайкатынан Кычкина Каролина 4 кылаас үөрэнээччитэ ааттанна.
“Намыына Куо”- анал аат хаһаайкатынан Павлова Влада, 10 кылаас үөрэнээччитэ буолла.
“Сандаара Куо”- анал аат хаһаайкатынан Ильина Емелияна, 5 кылаас үөрэнээччитэ ааттанна.
“Сааскылаана Куо”- анал аат хаһаайкатынан Санаайа Монастырева , 6 кылаас үөрэнээччитэ буолары ситистэ.
“Айталы Куо” – анал аат хаһаайкатынан Валерия Тарасова, 8 кылаас үөрэнээччитэ сүктэ.
Күрэхпитин кэлэн киэргэппит кыргыттарбытыгар, төрөппүттэрбитигэр барҕа махталбытын тиэрдэбит. Уонна бар дьоммутун өссө төгүл сандал саас кэлбитинэн эҕэрдэлээн тураммыт, баҕарыа этибит бары үчүгэйи, үтүөнү, сылааһы, сырдыгы.
Софья Шепелева
