Сэтинньи 9 күнүгэр Матта орто оскуолатыгар «Мин ‒ чинчийээччибин» научнай ааҕыылар буолан аастылар.
Бу күн оскуола үөрэнээччитэ барыта кэриэтэ кытынна. Бэйэлэригэр сөптөөх тиэмэни талан дьүүллүүр сүбэ иннигэр көмүскээтилэр. Санатан эттэххэ, бу кэмпириэнсийэ биһиэхэ сылга иккитэ ыытыллар. Урут да буоларын курдук бииртэн биир интэриэһинэй үлэлэр бааллара киһини сөхтөрөр. Бу күн оҕолор фетр матырыйаалтан Ньургун уонна Ньургуйаана диэн ааттаах куукулалары, көмпүүтэр, остуол, антистресс оонньуурдары, «Будущее моего села» бырайыак былаанын уонна урут олоро сылдьыбыт Семен Кычкин ампаарын макеттарын о.д.а. үлэлэри оҥорбуттар.
Дьүүллүүр сүбэ бэрэссэдээтэлэ, нуучча тылын учуутала Любовь Шергина санаатын үллэстэр: “Быйыл да буоларын курдук араас интэриэһинэй бырайыактар киирбиттэр. Ким эрэ саха кыыһын илин-кэлин кэбиһэрин чинчийэн-үөрэтэн оҥорбут бырайыагын көрдөрдө. Уолаттар волейболга мээчиги күүскэ охсорго тренажер оҥорбуттарын сөбүлээтибит. Инникитин оҕолор бэйэлэрэ ааҕан кэбиспэккэ тылларынан кэпсииргэ үөрэнэллэрэ буоллар диэн баҕа санаалаахпын”.
Дириэктэри иитэр үлэҕэ солбуйааччы Софья Шепелева маннык кэпсиир: «Үрдүкү кылаас үөрэнээччилэрэ ыраастык нууччалыы саҥарар уонна эппиэттиир эбиттэр. 10-с кылаас үөрэнээччитэ Влада Павлова «Кыыс Куо» бырайыагын ордук сэҥээрдибит. Манна ханнык тэрээһиннэр ыытыллыахтаахтарын ыйдарынан былааннаан, аттаран оҥорбут бырайыагын көмүскээтэ. Кэлэр ааҕыыларга элбэх биисинэс-бырайыактар баар буолуохтарын баҕарабыт».
Мин ордук бииргэ үөрэнэр Емелияна Ильина оҥорбут антистресс оонньуурдарын сөбүлээтим. Максим Кычкин Саха сиригэр кыстыыр көтөрдөр тустарынан остуол оонньуутун толкуйдаан эспиэрдэргэ оонньотто. Араас интэриэһинэй идеялаах учууталлар үлэлэрэ харахха быраҕыллар. Маннык тэрээһин оҕо дьон иннигэр толлубакка саҥара-иҥэрэ, бэйэтин санаатын этэ үөрэнэригэр, сайдарыгар туһалаах дии санаатым.
Бэргэн Александров, Е.Д.Кычкин аатынан Матта орто оскуолатын 5 кылааһын үөрэнээччитэ.
