Мэҥэ Хаҥалас улууһун «Манчаары» мини-футболга хамаандата Дьокуускай куорат Куубагын хаһаайынынан буолбут үөрүүлээх сонуна биир дойдулаахтарын сүргэлэрин көтөҕүөн көтөхтө. Олунньу ыйтан саҕаламмыт улахан эппиэттээх турнирга саалаҕа оонньонор өрөспүүбүлэкэбит футболга лиигаларыттан уопсайа 32 хамаанда кытынна. Күрэхтэһии олимпийскай систиэмэнэн барда. Хотторбут хамаандалар турниртан туораан истилэр.
«Манчаарылар» үрдүкү лиигаҕа Куубак хаһаайыннарын быһаарар эппиэттээх көрсүһүүгэ финалга Дьокуускайтан Физическэй култуураҕа уонна маассабай успуорка управлениетын (УФКиМС) хамаандатын 5:1 ахсаанынан итэҕэтиилээхтик кыайдылар. Хамаанда үрдүк ситиһиитин Айсен Саввин «Бастыҥ вратарь», Альберт Цыпандин «Бастыҥ оонньооччу» анал ааттарынан бэлиэтэнэн өссө бигэргэтэн, чиҥэтэн биэрдилэр.
‒ Бу анал аат финалга көрсүһүү түмүгүнэн эрэ бэриллибэт, ‒ диир «Бастыҥ вратарь» аатын сүкпүт Айсен Саввин. ‒ Турнир устата оонньуулар барыта учуоттаналлар. Мин бу аакка хамаандам көмөтө, өйөбүлэ суох тиксибэтим чахчы. Онон хамаанда бүттүүнүн үтүөтэ, өҥөтө диэн сыаналыыбын.
Бу күрэхтэһии мини-футболга быйылгы сезонун түмүктүүр тэрээһининэн буолла. «Манчаары» хамаанда кылаабынай тириэньэрэ Спиридон Васильев футболистарбыт күһүҥҥэттэн саҕалаан элбэх күрэхтэһиигэ, ол иһигэр былырыын сэтинньигэ Хабаровскай куоракка Уһук Илин эрэгийиэнигэр бастакы лиигаҕа бастыыр иһин күрэхтэһиигэ, быйыл муус устарга Ставрополь куоракка бастакы лиигаҕа Арассыыйатааҕы чөмпүйэнээттэригэр кыттыбыттарын, Дьокуускай куоракка үрдүкү лиигаҕа 12 хамаандаттан иккис, олунньу ыйга Саха сирин мини-футболга чөмпүйэнээтигэр үһүс буолбуттарын уонна аҕыйах хонуктааҕыта Дьокуускай куорат Куубагын чөмпүйүөннэринэн буолбуттарын кэпсээтэ. Спиридон Васильевич биһиги улууспут успуорка устуоруйатыгар бастакы лиигаҕа Арассыыйа чөмпүйэнээтигэр мини-футболга хамаандабыт бастакынан кыттыбытын чорботон бэлиэтээтэ.
«Манчаары» хамаандатын эдэр футболистара 2006 ‒ 2007 сыллах төрүөх оҕолорго тохсунньуга Спасск-Дальний куоракка Уһук Илин эрэгийиэнин чөмпүйэнээтигэр кыайыылааҕынан тахсыбыттара. Онтон саас кулун тутарга Нижний Новгород куоракка Арассыыйа чөмпүйэнээтигэр кыттан улахан таһымнаах күрэхтэһии «тыынын» билэн-көрөн, уопут ылан кэлбиттэрэ.
‒ Маннык үрдүк көрдөрүүлэр, кыайыылар ситиһиллэллэрэ улууспут футболга федерацията (бэрэссэдээтэл Мансур Мубаракшин) уонна улууспут футболга бэтэрээннэрэ сөптөөх хайысханы тутуһан үлэлииллэрин туоһулуур. «Манчаары» мини-футболга хамаандата улууспут салалтатыгар, чуолаан баһылык Дмитрий Тихоновка итиэннэ улуус футболга федерациятын салайааччытыгар Мансур Мубаракшиҥҥа, СӨ «ЦОПП» үөрэтэр киин тэрилтэтин дириэктэригэр Владислав Хабаровка, «Основа» тутуу ХЭТ киин генеральнай дириэктэригэр Юрий Поповка, СӨ Ил Түмэнин дьокутаатыгар Тихон Скрябиҥҥэ күрэхтэһиилэргэ кыттарбытыгар мэлдьи күүс-көмө, өйөбүл буолалларыгар махталбыт муҥура суох, ‒ диэтэ хамаанда кылаабынай тириэньэрэ Спиридон Васильев.
Улууспутун чиэстээхтик ааттатар «Манчаары» футболистарыгар үрдүк ситиһиилэринэн истиҥ эҕэрдэбитин тиэрдэбит уонна инникитин да үрдүктэн-үрдүк ситиһиилэри баҕарабыт.
Алена ДОКТОРОВА.
